खेड : वनवा हा वन विभागाच्या अधिकाऱ्यांनीच लावल्याच्या गैरसमजातून गावकऱ्यांनी मिळून २ वनअधिकाऱ्यांना बेदम मारहाण केल्याची धक्कादायक घटना बोरज सात्विनगाव (ता.खेड) परिसरात शनिवारी (ता.२८) सायंकाळी सहा वाजण्याच्या सुमारास घडली. याप्रकरणी खेड पोलीस ठाण्यात आठ जणांच्या विरोधात रविवारी (ता.२९) पहाटे गुन्हा दाखल करण्यात आला.
या मारहाणीत वनरक्षक परमेश्वर डोईफोडे आणि वनरक्षक अशोक ढाकणे हे गंभीर जखमी झाले असून त्यांच्यावर कळंबनी उपजिल्हा रुग्णालयामध्ये उपचार सुरू आहेत. याप्रकरणी वनरक्षक परमेश्वर डोईफोडे यांनी खेड पोलीस ठाण्यात तक्रार दिली आहे. त्यानुसार निलेश फावरे, अरविंद फावरे, धोंडू बैकर याच्यासह आठ जणांवर गुन्हा दाखल करण्यात आला आहे.
मिळालेल्या माहितीनुसार, बोरज सात्विन गावाच्या परिसरात असणाऱ्या सरकारी वनक्षेत्रामध्ये वनवा लागल्याची माहिती वनविभागाच्या अधिकाऱ्यांना मिळाली होती. मिळालेल्या माहितीच्या अनुषंगाने वनवा विझवण्यासाठी वनरक्षक परमेश्वर डोईफोडे, वनरक्षक अशोक ढाकणे आणि इतर वनविभागातील कर्मचारी तातडीने घटनास्थळी दाखल झाले. वनविभागाचे अधिकारी वनवा विझवित होते.
दरम्यान, वनवा विझवत असताना, स्थानिक ग्रामस्थांनी येऊन हा वनवा तुम्हीच लावला आहे. असा गैरसमज करून वनरक्षक परमेश्वर डोईफोडे आणि वनरक्षक अशोक ढाकणे यांना सात ते आठ जणांच्या जमावाने काठीने व लाथा बुक्क्यांनी बेदम मारहाण केली.
या मारहाणीत परमेश्वर डोईफोडे हे गंभीर जखमी झाले असून त्यांच्या डोक्याला हाताला व पाठीला गंभीर इजा झाली आहेत. तर अशोक ढाकणे यांना देखील अनेक ठिकाणी मुका मार लागला आहे. जखमींवर खेडमधील कळंबनी उपजिल्हा रुग्णालयामध्ये उपचार सुरू आहेत.
