पुणे : गेल्या काही दिवसांपासून आत्महत्याच्या घटनांमध्ये वाढ होताना दिसत आहे. पुणे सारख्या शहरात देखील अशा घटना घडत आहेत. दोन दिवसांपूर्वीच पुणे, शिवाजीनगर परिसरात राहणाऱ्या एका पोलीस कर्मचाऱ्याने आत्महत्या केल्याची बातमी समोर आली होती. आता नुकतीच एक ताजी घटना पुण्यात घडली आहे. ही घटना ताजी असतानाच पुण्यातील प्रसिद्ध क्लिनिकमध्ये काम करणाऱ्या एका डॉक्टरने आत्महत्या केली आहे. या घटनेने आता सर्वत्र एकच खळबळ उडाली आहे.
समोर आलेल्या माहितीनुसार, त्यांनी हॉस्टेलच्या राहत्या खोलीत गळफास घेऊन आत्महत्या केली. ही घटना काल (रविवारी) रात्री 10 वाजण्याच्या सुमारास उघडकीस आली आहे.
डॉक्टर श्याम व्होरा (वय 28) असं आत्महत्या करणाऱ्या व्यक्तीचं नाव आहे. आत्महत्या करण्यापूर्वी श्याम व्होरा यांनी एका कागदावर आपल्या मोबाईचा पासवर्ड लिहून ठेवला आहे. त्यामुळे त्यांच्या मृत्यूचे गूढ मोबाईलमध्ये लपले असावे असा प्राथमिक अंदाज वर्तवला जात आहे. त्यांनी आत्महत्या का केली? त्यांना कशाचा त्रास होता का किंवा कोणी त्यांना असं करण्यास भाग पाडलं? हे आता मोबाईल तपासल्यानंतरच समोर येईल. पोलीस या प्रकरणाचा तपास करत असून, डॉ श्याम यांनी एवढं टोकाचं पाऊल का उचललं याचं कारण लवकरच समोर येईल.
दरम्यान, काही दिवसांपूर्वीच, सोलापुरमधील प्रसिद्ध न्युरोफिजिशियन डॉ. शिरीष वळसंगकर यांनी स्वतःला गोळी झाडत आत्महत्या केली होती. या घटनेने संपूर्ण महाराष्ट्र हादरला होता.
