छ. संभाजीनगर: आज वटपौर्णिमेच्या एक दिवस आधी छत्रपती संभाजीनगर येथे पुरुषांच्या एका गटाने एका आगळ्यावेगळ्या पद्धतीने चक्क ‘कावळा पूजन’ केले. वटपौर्णिमेला सुवासिनी महिला आपल्या पतीच्या दीर्घायुष्यासाठी आणि कल्याणासाठी प्रार्थना करतात, याच्या अगदी उलट, या पुरुषांनी आपल्या पत्नींकडून होणाऱ्या त्रासाला कंटाळून सात जन्म ही बायको नको म्हणून अजब प्रार्थना केली. पुरुषांनी उलट प्रार्थना करत ‘पिंपळपौर्णिमा’ साजरी केली आहे. पत्नींकडून होणाऱ्या त्रासामुळे पत्नीपीडित पुरुषांनी पिंपळाच्या झाडाभोवती फेऱ्या मारल्या आणि कावळ्याची पूजा केली. वैवाहिक जीवनातील त्रासातून सुटका मिळावी, ही त्यांची या मागची प्रतीकात्मक मागणी होती. छत्रपती संभाजीनगरमध्ये पुरुषांनी केलेल्या कावळापूजनाने सगळ्यांचे लक्ष वेधले आहे.
पुरुषांनी पत्नींकडून होणारा त्रास आणि पतींना भेडसावणाऱ्या समस्यांकडे लक्ष वेधण्याचा प्रयत्न केला. अशा परिस्थितीत असलेल्या पुरुषांसाठी जागरूकता आणि समर्थनाची गरज असल्याचे त्यांनी अधोरेखित केले. महिलांकडून होणारे अत्याचार आणि त्रास पुरुष कुठेही व्यक्त करू शकत नाहीत, आणि अशा घटना वाढत असल्याचा दावा पत्नीपीडित पुरुषांनी केला आहे. दरम्यान, कावळ्याचे पूजन करत, “त्रास देणारी बायको सात जन्म तर काय, सात सेकंदही नको!” अशी अजब प्रार्थना करून बायकोच्या त्रासाला विरोध करत या आगळ्यावेगळ्या पद्धतीने आपली व्यथा मांडली. या ‘कावळा पूजन’ कार्यक्रमाने वैवाहिक संबंधांमध्ये पुरुषांना येणाऱ्या आव्हानांवर आणि समस्यांना सहानुभूतीपूर्वक समजून घेण्याच्या गरजेवर चर्चा सुरू झाली आहे.
