वाघोली, (पुणे) : पुणे शहर, पिंपरी चिंचवड आयुक्तालय आणि जिल्ह्याच्या हद्दीतून तडीपार करण्यात आलेल्या आरोपीला गुन्हे शाखा युनिट – 6 च्या पोलिसांनी राहत्या घरातून सोमवारी (ता. 17) अटक केली आहे. श्यामकांत विष्णू सातव (वय 40 रा. डोमखेल वस्ती, आव्हाळवाडी, ता. हवेली, जि पुणे) असे अटक करण्यात आलेली आरोपीचे नाव आहे.

पोलिसांनी दिलेल्या माहितीनुसार, गुन्हे शाखा युनिट- 6 चे पथक शहर पोलीस ठाण्याच्या हद्दीत गस्त घालीत असताना ऋषीकेश व्यवहारे यांना बातमीदारामार्फत बातमी मिळाली की, रेकॉर्डवरील तडीपार गुन्हेगार श्यामकांत सातव हा त्याच्या घरी आला आहे. मिळालेल्या माहितीनुसार सातव याला राहत्या घरातून ताब्यात घेतले.
सदर आरोपी सराईत गुन्हेगार असून त्याला तडीपार आदेश क्र. 38/2024 नुसार मुंबई पोलीस अधिनियम कलम 56 (1),(अ)(ब) प्रमाणे 12 ऑगस्ट 2024 रोजी दीड वर्षासाठी पुणे शहर व पिंपरी चिंचवड आयुक्तालय आणि जिल्ह्याच्या हद्दीतुन तडीपार केले होते. सोमवारी (ता. 17) सातव हा सदर आदेशाचे उल्लंघन करताना मिळून आल्याने त्याच्याविरुध्द महाराष्ट्र पोलीस अधिनियम कलम 142 अन्वये वाघोली पोलीस स्टेशन येथे गुन्हा नोंद करून पुढील तपास करण्यासाठी वाघोली पोलीस स्टेशनच्या स्वाधीन करण्यात आले आहे.

सदरची कामगीरी गुन्हे शाखा, युनिट 6 चे प्रभारी पोलीस निरीक्षक वाहिद पठाण यांच्या मार्गदर्शनाखाली ऋषीकेश व्यवहारे, नितीन धाडगे, सुहास तांबेकर, गणेश डोंगरे, किर्ती नरवडे, प्रतीक्षा पानसरे यांनी केली आहे.







