पुणे : नगर रस्त्यावर अपघातांचे प्रमाण वाढत आहे. भरधाव डंपरच्या धडकेत सायकलस्वाराचा मृत्यू झाल्याची घटना नगर रस्त्यावरील खराडी भागात नुकतीच घडली. या प्रकरणी डंपर चालकाविरोधात गुन्हा दाखल करण्यात आला आहे.
ध्रुव कुमार यादव (३०, रा. कुकरीपूर, तुर्कीपूर, जि. बस्ती, उत्तरप्रदेश) असे मृत्युमुखी पडलेल्या सायकलस्वाराचे नाव आहे. याबाबत जमालुद्दीन सय्यद (३०, रा. उबाळेनगर, वाघोली) याने चंदननगर पोलीस ठाण्यात फिर्याद दिली आहे.
याबाबत पोलिसांनी दिलेल्या माहितीनुसार, यादव हा मूळचा उत्तर प्रदेशचा रहिवासी आहे. तो वाघोली परिसरात मजुरी करत होता. नगर रस्त्यावरील खराडी भागातून यादव सायकलवरून निघाला असताना भरधाव डंपरने सायकलस्वार यादवला धडक दिली. गंभीर जखमी झालेल्या यादवचा उपचारापूर्वीच मृत्यू झाला.
दरम्यान, अपघातानंतर डंपरचालक पसार झाला. डंपर चालकाचा शोध घेण्यात येत आहे. सहायक पोलीस निरीक्षक सिद्धनाथ खांडेकर या घटनेचा पुढील तपास करत आहेत.
