पुणे: सार्वजनिक बांधकाम विभागात कामाची टेंडर घेणार्या दोन ठेकेदारांनी अनेक तरुणांना नोकरीचे आमिष दाखवून त्यांच्याकडून लाखो रुपये उकळल्याची घटना समोर आली आहे. यासाठी तरुणांना बनावट नियुक्तीपत्र देऊन त्यांची फसवणूक केल्याचा प्रकार उघडकीस आला आहे.
याबाबत आळंदी देवाची येथील एका 21 वर्षीय तरुणाने बंडगार्डन पोलीस ठाण्यात तक्रार दिली आहे. त्यानंतर पोलिसांनी गुन्हा दाखल केला आहे. उदय शिंदे (वय 50, रा. कोल्हापूर) आणि अरुण देशमुख (वय40, रा. सांगली) असे गुन्हा दाखल झालेल्या ठेकेदारांचे नाव आहे. हा फसवणुकीचा प्रकार सेंटल बिल्डिंग येथील सार्वजनिक बांधकाम विभागात 1 फेब्रुवारी 2024 ते 30 मे 2025 दरम्यान घडला.
दिलेल्या माहितीनुसार, आरोपी शिंदे आणि देशमुख हे सार्वजनिक बांधकाम विभागात टेंडर घेण्याचे काम करतात. आरोपींची एका महिलेच्या माध्यमातून फिर्यादी तरुणाशी ओळख झाली. त्यानंतर सार्वजनिक बांधकाम विभागात गट क पदावर सरकारी नोकरी लावतो, असे आमिष आरोपींनी दाखविले. सार्वजनिक बांधकाम विभागात ओळख असल्याचे दाखवत आरोपी ठेकेदारांनी तरुणांचा विश्वास संपादन केला. त्यानंतर त्यांच्याकडून प्रत्येकी तीन लाख रुपये घेतले. मात्र पैसे घेऊनही बरेच दिवस तरुणांना नोकरी दिली नाही.
दरम्यान, तरुणांनी तगादा लावल्यावर त्यांना सार्वजनिक बांधकाम विभागात गट क पदावर नियुक्ती झाल्याचे नियुक्तीपत्र दिले. नियुक्तीपत्र घेऊन ते सार्वजनिक बांधकाम विभागात गेल्यावर त्यांना आपली फसवणूक झाल्याचे समजले. तरुणांनी ठेकेदारांना पैसे परत मागण्यास सुरुवात केली. परंतु, त्यांनी पैसे न मिळाल्याने अखेर आता या तरुणांनी बंडगार्डन पोलीस ठाण्यात तक्रार दिली आहे.
सदर आरोपींनी अनेक जणांची फसवणूक केल्याचा पोलिसांना संशय आहे. बंडगार्डन पोलीस ठाण्यात आतापर्यंत 8 जणांनी तक्रार अर्ज दिले आहेत. पोलीस उपनिरीक्षक गणेश चव्हाण तपास करीत आहेत.
