पुणे : किरकोळ कारणावरुन वाद होऊन वादाचे रुपांतर हाणामारीमध्ये झाले. यामध्ये एका तरुणाला चार जणांच्या टोळक्याने लोखंडी हत्याराने, विटांनी आणि लाथा-बुक्क्यांनी मारहाण करुन गंभीर जखमी केले. हा प्रकार हडपसर येथील आण्णासाहेब मगर महाविद्यालयाच्या मागील बाजूस घडला. या प्रकरणी तिघांवर हडपसर पोलीस ठाण्यात गुन्हा दाखल करण्यात आला आहे.
बुधवारी (ता. २०) दुपारी बाराच्या सुमारास हा प्रकार घडला. याबाबत युवराज देवराज भंडारी (रा. लक्ष्मी नगर, शेवाळवाडी, मांजरी फार्म, पुणे) याने हडपसर पोलीस ठाण्यात फिर्याद दिली आहे. यावरुन तेजस नांगरे व त्याच्या सोबत असलेल्या इतर दोन ते तीन जणांवर गुन्हा दाखल केला आहे. पोलिसांनी दिलेल्या माहितीनुसार, फिर्यादी युवराज भंडारी आणि आरोपी एकाच कॉलेजमध्ये शिक्षण घेत आहेत. भंडारी याचा आरोपी नांगरे याला धक्का लागला. त्यामुळे दोघांमध्ये किरकोळ वाद होऊन बाचाबाची झाली. याच कारणावरुन आरोपींनी त्यांच्या हातातील लोखंडी हत्याराने, विटांनी व लाथाबुक्क्यांनी युवराज याच्या डोक्यात, हातावर तसेच पाठीवर बेदम मारहाण करुन जखमी केले. शिवीगाळ करुन ‘यावेळी सोडतो पण परत नडला तर हात पाय तोडून मारुन टाकीन’, अशी धमकी दिली.
या प्रकरणाचा पुढील तपास पोलीस हवालदार एम. जी. सकट करीत आहेत.
