न्हावरे : मांडवगण फराटा (ता.शिरूर) येथे स्थानिक व्यावसायिकाला किरकोळ कारणावरून ओळखीच्या इसमाकडून दगड मारून तसेच लाथाबुक्यांनी मारहाण करून जीवे मारण्याची धमकी देण्यात आल्याची गंभीर घटना रविवारी (ता.5) सकाळी पावणेसात वाजण्याच्या सुमारास घडली.
या प्रकरणी दत्तात्रय त्रिंबक काळे (वय 40,रा.मांडवगण फराटा,ता.शिरूर, जि.पुणे) यांनी दिलेल्या फिर्यादीवरून किशोर शिवाजी कदम(रा.मांडवगण फराटा,ता.शिरूर,जि.पुणे) यांच्याविरुद्ध शिरूर पोलीस ठाण्यात गुन्हा दाखल करण्यात आला आहे.
फिर्यादी दत्तात्रय काळे यांच्या सिद्धी इंटरप्रायजेस या टायर दुकानासमोर आरोपी किशोर कदम हे रविवारी (ता.5) सकाळी पावणेसात वाजता दगडफेक करत असल्याचे काळे यांनी पाहिले. त्यामुळे त्यांनी किशोर कदम यांना विचारणा केली असता, “दुकान चालू करू नकोस”असे म्हणत कदम यांनी वाद घातला व संतापलेल्या कदम यांनी काळे यांच्यावर दगड फेकून त्यांच्या डाव्या हाताला दुखापत केली. तसेच कानाखाली चापट मारत लाथाबुक्यांनी मारहाण केली. त्यानंतर आरोपीने शिवीगाळ व दमदाटी करून “तुला जिवंत ठेवणार नाही” अशी धमकीही दिली, असे फिर्यादीत नमूद केले आहे.
दरम्यान, या घटनेचा पुढील तपास शिरूरचे पोलिस निरीक्षक संदेश केंजळे यांच्या मार्गदर्शनाखाली मांडवगण फराटा पोलिस करीत आहेत.
