पुणे: पुण्यातील कोंढवा परिसरात बेपत्ता झालेल्या एका अल्पवयीन मुलीच्या प्रकरणात सायबर फसवणुकीचा धक्कादायक प्रकार समोर आला आहे. मुलीचा शोध सुरू असताना अज्ञात व्यक्तींनी तिच्या वडिलांना मुलीचे अपहरण झाल्याचे भासवून 15 हजार रुपये उकळल्याची घटना उघडकीस आली आहे. दरम्यान, पोलिसांनी अवघ्या 17 तासांत मुलीचा शोध घेऊन तिला झारखंडमधून सुखरूप ताब्यात घेतले.
मिळालेल्या माहितीनुसार, कोंढवा परिसरात राहणाऱ्या 17 वर्षीय मुलगी अचानक बेपत्ता झाली होती. यानंतर तिच्या वडिलांनी कोंढवा पोलीस ठाण्यात तक्रार दाखल केली. तक्रार मिळताच पोलिसांनी तातडीने तपास सुरू करत सीसीटीव्ही फुटेज आणि इतर तांत्रिक माहितीच्या आधारे शोधमोहीम राबवली.
याच काळात मुलीच्या वडिलांच्या मोबाईलवर एका अनोळखी व्यक्तीचा व्हिडिओ कॉल आला. कॉल करणाऱ्याने मुलगी त्यांच्या ताब्यात असल्याचा दावा केला. व्हिडिओमध्ये मुलीचे हातपाय बांधलेले असल्याचे दाखवत 50 हजार रुपयांची मागणी करण्यात आली. मुलीच्या सुरक्षिततेच्या चिंतेत असलेल्या वडिलांनी घाबरून तीन हप्त्यांमध्ये एकूण 15 हजार रुपये संबंधित खात्यावर पाठवले.
दरम्यान, पोलिसांनी तपास सुरू ठेवत पुणे रेल्वे स्थानकावरील सीसीटीव्ही फुटेज तपासले. त्यामध्ये मुलगी हावड्याकडे जाणाऱ्या रेल्वेत बसल्याचे दिसून आले. त्यानंतर झारखंडमधील टाटानगर रेल्वे स्थानकावर रेल्वे पोलिसांच्या मदतीने मुलीचा शोध घेण्यात आला आणि तिला सुरक्षित ताब्यात घेण्यात आले.
तपासात समोर आले की, मुलीचा शोध लागावा म्हणून तिचा फोटो आणि माहिती सोशल मीडियावर प्रसारित करण्यात आली होती. त्याच माहितीचा गैरवापर करून सायबर चोरट्यांनी बनावट अपहरणाचा व्हिडिओ तयार केला आणि वडिलांची फसवणूक केली.
या प्रकरणी अज्ञात आरोपींविरुद्ध गुन्हा दाखल करण्यात आला असून पोलिसांकडून पुढील तपास सुरू आहे.
