दीपक खिलारे
Bawada Grampanchayat Election: इंदापूर : बावडा (ता. इंदापूर) येथे भाजप नेते व माजी मंत्री हर्षवर्धन पाटील यांनी रविवारी (ता. ५) ग्रामपंचायतीच्या निवडणुकीसाठी सहकुटुंब मतदानाचा हक्क बजावला. यावेळी इंदापूर तालुका जिजाऊ बचत गट असोसिएशनच्या अध्यक्षा भाग्यश्री पाटील, पुणे जिल्हा भाजप युवा मोर्चाच्या अध्यक्षा अंकिता पाटील ठाकरे, निरा-भिमा कारखान्याचे संचालक राजवर्धन पाटील यांच्यासह कुटुंबातील अन्य सदस्यांनीही मतदानाचा हक्क बजावला.
बावडा गावचे नेतृत्व पार्लमेंटपर्यंत पोहोचले आहे. गावामध्ये सुमारे २८ जाती-धर्माचे लोक एका विचाराने राहत आहेत. विकासकामांमध्ये या सर्व जाती धर्मांना आंम्ही सहभागी करून घेत असल्याने ग्रामपंचायतीच्या स्थापनेपासूनच आमच्या विचाराचे नेतृत्व येथे काम करीत आहे. बावडा ग्रामपंचायतीसाठी १०२७० मतदार आहेत. बावडा ग्रामपंचायतीसाठी सरपंचपद व सदस्यांच्या १७ जागांसाठी मतदान होत असून, या सर्व जागी भाजपप्रणित पॅनेलचे उमेदवार मोठ्या मताधिक्याने विजयी होतील, असा विश्वास यावेळी हर्षवर्धन पाटील यांनी व्यक्त केला.
इंदापूर तालुक्यामध्ये बावडा तसेच वकीलवस्ती, शेळगाव, शिंदेवाडी, काझड, अकोला या ६ ग्रामपंचायतींसाठी मतदान होत असून, याठिकाणी आमच्या विचारांना जनतेकडून निश्चितपणे साथ मिळेल, असेही त्यांनी स्पष्ट केले. राज्यामध्ये ग्रामपंचायत निवडणुकांमध्ये सत्तारूढ महायुती आपले निर्विवाद वर्चस्व प्रस्थापित करेल, असेही हर्षवर्धन पाटील यांनी नमूद केले.
