पुणे : उपमुख्यमंत्री अजित पवार यांनी शिरूर मतदारसंघाचे खासदार अमोल कोल्हे यांच्यावर टीका केल्यानंतर राजकारणात खळबळ उडाली आहे. आता राष्ट्रवादी काँग्रेसचे आमदार रोहित पवार यांनी अजित पवार यांच्या टीकेला प्रत्युत्तर दिले आहे. संघर्ष यात्रा, पदयात्रेच्या माध्यमातून आम्ही लोकांमध्ये जाण्याचा विचार करत असतो. आम्ही लोकांना महत्त्व देण्याचा विचार करतो. शेवटी आम्ही लोकांच्या हिंमतीवर, ताकदीवर लढणार आहोत. जे सत्तेत आहेत त्यांना पैशांचा आणि अहंकाराचा माज आहे. मात्र, आम्ही निवडून आलो तर लोकांमुळे, निवडून नाही आलो तरी लोकांमुळेच… आम्ही अखेरपर्यंत लढत राहणार, असे रोहित पवार म्हणाले. आता पवार विरुद्ध पवार करण्याची भाजपची इच्छा आहे, असेही रोहित पवार यांनी म्हटले आहे.
अजित पवारांच्या टीकेला उत्तर देताना रोहित पवार म्हणाले की, केंद्र सरकारमधील नेते त्यांच्या पूर्ण ताकदीने आम्हाला अडचणीत आणण्याचा प्रयत्न करत आहेत. मात्र, आम्ही संघर्ष यात्रा, पदयात्रेच्या माध्यमातून लोकांमध्ये जाण्याचा विचार करत असतो. लोकांमध्ये जाणे त्यांना योग्य वाटत नसेल तर तो त्यांचा विषय आहे. शरद पवार यांनी स्वतःच्या हिंमतीवर पक्ष उभा केला. लोकांशी संपर्क ठेवला. वयाच्या ३८ साव्या वर्षी त्यांनी जे केले त्याला बंड म्हणता येणार नाही. त्यावेळी अनेक लोकांनी एकत्र येऊन तो निर्णय घेतला होता. आता सत्तेत असणारे नेते अनेक वर्ष शरद पवारांमुळे सत्तेत होते, असेही रोहित पवार यांनी स्पष्ट केले.
भाजपबरोबर तुम्ही गेलात तर भाजपची स्क्रिप्ट वाचावीच लागते, अशी टीका करत रोहित पवार म्हणाले की, मुख्यमंत्री एकनाथ शिंदेंसोबत तेच झाले. आता अजितदादांसोबतही तेच होत आहे. भाजपला कुठेही पवार परवडणारे नाहीत. टप्प्याटप्प्याने अजित पवारांची ताकद कमी करण्याचा प्रयत्न मागील काही महिन्यांत झाला आहे. आता पवार विरुद्ध पवार करण्याची भाजपची इच्छा आहे, असेही रोहित पवार यांनी म्हटले आहे.
