लोणी काळभोर, ता.14 : सांडपाण्याची ड्रेनेज लाईनची दुरुस्ती करताना झालेल्या जागेच्या वादातून तीन पुतण्यांनी चुलत्याच्या डोक्यात कुदळ मारून जीवे मारण्याचा प्रयत्न केल्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील रामकृषी कंपनीच्या पाठीमागे असलेल्या राहिंजवस्ती परिसरात रविवारी (ता.13) सायंकाळी पाच वाजण्याच्या सुमारास घडली आहे. या हाणामारीत एक जण गंभीर जखमी झाला आहे. तर तीन जणांवर लोणी काळभोर पोलीस ठाण्यात गुन्हा दाखल करण्यात आला आहे.
विलास किसन महानवर (वय 59, लोणी काळभोर, ता. हवेली जि. पुणे) असे जखमी झालेल्यांचे नाव आहे. तर युवराज विठ्ठल महानवर, अक्षय रामदास महानवर व अमित कैलास महानवर (सर्व रा लोणी काळभोर ता हवेली जि पुणे) अशी गुन्हा दाखल झालेल्यांची नावे आहेत.
पोलिसांनी दिलेल्या माहितीनुसार, फिर्यादी विलास महानवर हे कुटुंबासोबत राहिंजवस्ती परिसरात राहतात. फिर्यादी यांच्या घरातील सांडपाणी व्यवस्थीत निचरा होत नव्हता. म्हणून फिर्यादी, त्यांचा
मुलगा राहुल, पत्नी शोभा असे तिघे मिळून घरा समोरील ड्रेनेजचा पाईप कुदळीच्या सहाय्याने साफ करत होतो.
दरम्यान, फिर्यादी व त्यांच्या घरातील सदस्य ड्रेनेज साफ करता असताना, वरील तिन्ही आरोपी तेथे आले. आणि फिर्यादी यांना म्हणाले, तुम्ही ज्या जागेत काम करत आहेत, ती जागा माझ्या वाट्याला आली असुन, तुम्ही येथे कोणतेही काम करायचे नाही. असे म्हणुन फिर्यादी यांना लोखंडी कुदळीने डोक्यात मारहाण करुन जखमी केले. फिर्यादी यांना मारहाण होत असल्याचे पाहून फिर्यादी यांची पत्नी व मुलगा भांडणे सोडविण्यासाठी मध्यस्थी करू लागले. तेव्हा आरोपींनी त्यांनासुद्धा शिवीगाळ करून मारहाण करून जिवे मारण्याची धमकी दिली.याप्रकरणी विलास महानवर यांनी लोणी काळभोर पोलीस ठाण्यात फिर्याद दिली आहे.
त्यानुसार आरोपींच्या विरोधात भारतीय न्याय संहिता 2023 कलम ११८ (१), ११५(२), ३५१ (१), ३५२ (३) (५) प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलिस हवालदार योगेश कुंभार करीत आहेत.
