विशाल शिंदे
Bhor News नसरापूर, ता. 29 : भोर तालुक्यातील नसरापूर येथे खत नियंत्रण आदेश १९८५ अंतर्गत गंभीर अनियमितता आढळल्यानंतर मे. संतोष अॅग्रो एजन्सीवर प्रशासनाने कडक कारवाई केली आहे. जिल्हा अधिक्षक कृषी अधिकारी, पुणे यांनी परवाना नूतनीकरण होईपर्यंत खत विक्रीस तात्पुरती बंदी घालण्याचा आदेश दिला असून, या कारवाईमुळे परिसरातील खत विक्री केंद्रांमध्ये मोठी खळबळ उडाली आहे. Bhor News
तपासणीत परवान्यात नमूद नसलेल्या खतांची विक्री, साठा नोंदवही व प्रत्यक्ष साठ्यात तफावत, तसेच ग्राहकांना दिसेल अशा ठिकाणी दर फलक न लावणे अशा गंभीर त्रुटी आढळून आल्या. सुनावणीदरम्यान संबंधितांनी या त्रुटी मान्य केल्याची माहिती प्रशासनाकडून देण्यात आली.
या पार्श्वभूमीवर खते नियंत्रण आदेशातील विविध कलमांचे उल्लंघन झाल्याचे स्पष्ट होताच अधिकाऱ्यांनी परवाना नूतनीकरणापर्यंत सर्व विक्री थांबवण्याचा निर्णय घेतला. आदेशाचे उल्लंघन केल्यास कठोर कायदेशीर कारवाईचा इशाराही देण्यात आला आहे.
दरम्यान, नसरापूर परिसरातील इतर काही विक्रेतेही दर फलक न लावता व्यवसाय करत असल्याची तक्रार पुढे आली असून, अशांवरही कारवाईची मागणी शेतकरी व नागरिकांकडून जोर धरू लागली आहे. या कारवाईमुळे नियमांचे काटेकोर पालन करण्याचा स्पष्ट संदेश जिल्ह्यातील सर्व खत विक्रेत्यांना मिळाला आहे.
