जीवन सोनवणे
Bhor news : भोर : हिर्डोशी (ता. भोर) येथे गणेश विसर्जनावेळी आरती करत असताना अचानक मधमाशांनी ग्रामस्थांवर हल्ला केला. या हल्ल्यात १५० पेक्षा अधिक ग्रामस्थांचा मधमाशांनी चावा घेतला. यामध्ये महिला, पुरुष व लहान मुलांचा समावेश आहे. हल्ल्यात जखमी झालेल्या सर्वांवर हिर्डोशी येथील प्राथमिक आरोग्य केंद्रात उपचार करण्यात आले.
हिर्डोशी प्राथमिक आरोग्य केंद्रात जखमींवर उपचार
हिर्डोशी येथील स्मशानभूमीशेजारी असलेल्या नीरा देवघर धरणाच्या पाण्यात गणपती विसर्जन केले जाते. त्याच ठिकाणी विसर्जन मिरवणूक साडेतीन वाजण्याच्या पोहचली. गणेश विसर्जनापूर्वी आरती करत असताना अचानक मधमाशा घोंगाऊ लागल्या व आरती सुरू असतानाच ग्रामस्थांवर मधमाशांनी हल्ला केला. हिर्डोशी येथील सोमजाईवस्ती, हरळीचा माळ आणि टाकीचा माळ या परिसरातील नागरिक विसर्जनासाठी येथे उपस्थित होते. यामध्ये लहान मुले, युवक, महिला, पुरुष अशा १५० पेक्षा अधिक जणांचा समावेश होता. (Bhor news) या प्रत्येकाला मधमाशांनी चावा घेतला. त्यामुळे सर्वजण वाट मिळेल तिकडे पळू लागले.
दरम्यान, काही तासाने मधमाशांचा थवा उडून गेल्यावर स्थानिक ग्रामस्थ धोंडिबा मालुसरे, बबन मालुसरे, बबन राजीवडे, अरुण मालुसरे, लक्ष्मण धामुनसे, संतोष मालुसरे, अंकुश धामनसे आदी ग्रामस्थांनी टाकीचा माळ, हरळीचा माळ व सोमजाईवस्ती येथील नागरिकांच्या गणेश व गौरी विसर्जन एकत्रित केले.
मधमाशांच्या चाव्यात गंभीर जखमी झालेल्या नागरिकांवर प्राथमिक आरोग्य केंद्रात इंजेक्शन, गोळया व औषधोपचार देऊन उपचार करण्यात आले. (Bhor news) हिर्डोशी येथील आरोग्य केंद्रात वैदयकीय अधिकारी पदे रिक्त असल्याने, नागरिकांवर प्रथमोपचार करता आले नाहीत. मात्र, आज डॉ. दरेकर यांनी येथील नागरिकांवर उपचार करुन औषधोपचार केले.
अधिक बातम्या वाचण्यासाठी येथे क्लिक करा :
Bhor News : राजगड कारखान्याची मंगळवारी सर्वसाधारण सभा..
Loni Kalbhor News : एंजल हायस्कूलच्या यश काळभोर याची विभागीय स्तरावरील कुस्ती स्पर्धेसाठी निवड..
