Arrested | पुणे : सिंहगड रस्त्यावरील वडगाव खुर्दच्या अग्निशमन केंद्राच्या जवळ असलेल्या ग्रीनफिल्ड रेस्टोबार व फॅमिली गार्डनच्या दोघांवर हत्याराने सपासप वर करून खुनी हल्ला केल्याची धक्कादायक घटना शनिवारी (ता.१५) मध्यरात्रीनंतर घडली आहे. याप्रकरणी सिंहगड रोड पोलिसांनी तिघांना अटक केली आहे.
सुमित शेजवळ, मदनराज गेटयाल, यश शेजवळ असे अटक करण्यात आलेल्या आरोपींची नावे आहेत. तर त्यांच्या इतर ७ ते ८ साथीदारांवर गुन्हा दाखल करण्यात आला आहे.
या हल्ल्यात सुहास सुभाषचंद्र हेगडे (वय-३३, रा. एन/६, सेक्करेड हॉटी टाऊन, जगताप चौक, वानवडी, पुणे) आणि रेस्टो बारमधील वेटर आसीक मंडल हे दोघे जखमी झाले आहेत. याप्रकरणी हेगडे यांनी सिंहगड रोड पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, सुहास हेगडे हे त्यांचे ग्रीनफिल्ड रेस्टोबार व फॅमिली गार्डन हे हॉटेल शनिवारी मध्यरात्री बंद करत होते. त्यावेळी आरोपी सुमित शेजवळ हा हॉटेलच्या बंद गेटच्या वरून उडी मारून आत आला. त्याने हेगडे यांच्याशी वाद व हुज्जत घालू लागला. हेगडे यांनी त्याला प्रवेश दिला नाही म्हणुन सुमित शेजवळला राग आला.
त्यानंतर हेगडे हे त्यांच्या ओळखीचे रोहन शहा यांच्याशी हॉटेलसमोर गप्पा मारत असताना, आरोपी सुमित शेजवळने पाठीमागुन येवुन अचानकपणे खुनी हल्ला चढविला. आरोपीने हेगडे यांच्या डोक्यावर, उजव्या कानाजवळ व पाठीवर धारदार हत्याराने वार करून त्यांना जीवे ठार मारण्याचा प्रयत्न केला. तर आरोपीपैकी एकाने हॉटेलमधील वेटर आसीक मंडल याच्या डोक्यावर धारदार हत्याराने वार करून त्याच्या खुनाचा प्रयत्न केला. या गल्ल्यात हेगडे आणि हॉटेलमधील वेटर गंभीर जखमी झाले आहेत.
दरम्यान, या घटनेची माहिती मिळताच, सिंहगड रोड पोलिस तातडीने घटनास्थळी दाखल झाले. पोलिसांनी तीन आरोपींना ताब्यात घेतले आहे. पुढील तपास सहायक पोलिस निरीक्षक चंदनशिव करीत आहेत.
