लोणी काळभोर : लाचखोरीला आळा घालण्यासाठी आता अँटी करप्शन ब्युरो आता लोणी काळभोरसह जिल्ह्यातील 26 गावांना भेटी देणार आहे. 13 ऑक्टोबर ते 16 ऑक्टोबर या चार दिवसाच्या कालावधीत अँटी करप्शन कायद्याबाबत जनजागृती मोहीम राबवली जाणार आहे. यावेळी नागरिकांशी संवाद साधणार आहेत. अशी माहिती पुणे लाचलुचपत प्रतिबंधक विभागाचे सहाय्यक पोलीस आयुक्त दयानंद गावडे यांनी दिली आहे.
जर कोणताही अधिकारी किंवा मध्यस्थ व्यक्ती तुमच्याकडे लाचेची मागणी करत असेल, तर आता तुम्हाला तक्रार देण्यासाठी पुण्यात एसीबी कार्यालयात जाण्याची गरज नाही. कारण आता अँटी करप्शन ब्युरोच तुमच्या दारी येत आहे. या विशेष जनजागृती कार्यक्रमादरम्यान, एसीबीचे अधिकारी त्यांच्या पथकासह खाली दिलेल्या तारखांना तालुक्याच्या शासकीय गेस्ट हाऊसमध्ये उपस्थित राहतील. अधिकारी परिसरातील समाजसेवक, अशासकीय संस्थांचे पदाधिकारी तसेच एसीबीकडे यापूर्वी तक्रार केलेल्या नागरिकांच्या भेटी घेऊन त्यांच्या तक्रारी व समस्या ऐकून घेतील. असे सहाय्यक पोलीस आयुक्त दयानंद गावडे यांनी असे परिपत्रकाद्वारे जाहीर केले आहे.
सासवड, जेजुरी व नीरा या ठिकाणी सहाय्यक पोलीस निरीक्षक भारती मोरे, वडगाव मावळ व लोणावळा येथे सहाय्यक पोलीस निरीक्षक निता मिसाळ तर खेड व चाकण येथे सहाय्यक पोलीस निरीक्षक सतीश वाळके हे या गावांना सोमवारी (ता.13) भेटी देणार आहेत. दुसऱ्या दिवशी मंगळवारी (ता.14) बारामती, मोरगाव येथे पोलीस निरीक्षक शैलजा शिंदे, वाघोली, शिक्रापूर व शिरूर येथे पोलीस निरीक्षक आसावरी शेडगे तर आळेफाटा, जुन्नर, नारायणगाव व मंचर येथे पोलीस निरीक्षक सुहास हट्टेकर उपस्थित राहणार आहेत.
दरम्यान, भिगवण व इंदापुर येथे पोलीस निरीक्षक अविनाश घरबुडे, लोणी काळभोर, दौंड व यवत येथे खंडेराय रंजवे तर भोर, राजगड, वेल्हा येथे पोलीस निरीक्षक प्रसाद लोणारे हे या गावांना बुधवारी (ता.15) भेट देणार आहेत. तर चौथ्या दिवशी शुक्रवारी (ता.26) पोलीस निरीक्षक सुहास हट्टेकर हे पिरंगुट व पौड येथे उपस्थित राहणार आहेत. यावेळी सर्व अधिकारी नागरिकांच्या तक्रारी घेऊन त्वरित सोडविण्यासाठी प्रयत्न करणार आहेत. तसेच यावेळी नागरिकांना अँटी करप्शन कायद्याबाबत जनजागृती करणार आहेत.
कोणताही लोकसेवक, शासकीय अधिकारी, कर्मचारी किंवा त्यांच्या वतीने खाजगी एजंट तुमचे शासकीय काम करण्यासाठी कायदेशीर फी व्यतिरिक्त लाचेची मागणी करत असल्यास, एसीबीच्या अधिकाऱ्यांची भेट घेऊन तातडीने तक्रार दाखल करावी. अन्यथा अॅन्टी करप्शन ब्युरो, पुणे दुरध्वनी क्रमांक-020-26122134, 26132802, 26050423 व संपर्क साधावा. तसेच व्हॉट्स अॅप क्रमांक 9403781064 यावरही आपली तक्रार नोंदवू शकता. तुमची तक्रार जागेवरच स्वीकारली जाईल आणि त्वरित पुढील कार्यवाही सुरू केली जाईल?
शिरीष सरदेशपांडे (पोलीस अधीक्षक – लाचलुचपत प्रतिबंधक विभाग, पुणे)
