पुणे : लोणावळ्यात वर्षाविहारासाठी गेलेले पाच जण भुशी धरणात वाहून गेले आहेत. भुशी धरणाच्या पाठीमागे असलेल्या जंगलातील वॉटर फॉलमध्ये आलेलं कुटुंब भुशी धरणाच्या बॅक वॉटरमध्ये वाहून गेलं. त्या पाण्यात 9 जण अडकले. त्यातील चार जणांना वाचवण्यात यश आलं. मात्र एक महिला आणि चार मुले वाहून गेले. यातील चार जणांचा मृतदेह हाती लागला आहे, मात्र अद्यापही एकाचा शोध सुरु आहे.
या घटनेबाबत एक धक्कादायक माहिती समोर आली आहे. ती म्हणजे धबधब्यावर जाण्यासाठी बंदी असताना सुद्घा देखील हे कुटुंब या धबधब्याकडे गेले आणि त्यांना स्वत:चा जीव गमवावा लागला. भुशी डॅम परिसरात फिरायला आलेल्या पर्यटकांना प्रशासनाने सूचना फलकांद्वारे सुचित करुनही पर्यटक या सुचनांकडे दुर्लक्ष करत असल्याचे समोर येत आहे. जर त्या सुचनांचे पालन केले असते तर कदाचित अन्सारी कुटुंबांचा जीव वाचला असता.
दरम्यान, पुण्याच्या हडपसर भागामध्ये राहत असलेले अन्सारी कुटुंबीय लग्न समारंभावरून येत असताना लोणावळा परिसरामध्ये असणाऱ्या भुशी डॅम परिसरामध्ये वर्षाविहारासाठी उतरले होते. मात्र, ते ज्या ठिकाणी उतरले होते, त्या ठिकाणी शक्यतो कोणी वर्षाविहारासाठी जात नाही. हे कुटुंबीय त्या ठिकाणी गेले आणि त्यांच्यातील पाच जणांचा मृत्यू झाला.
