सोलापूर: रस्त्यावरील पावसाचे पाणी अंगावर उडाल्याच्या रागातून दुचाकी चालकाने महामंडळाच्या एस.टी. बस चालकाची गचांडी धरून प्रवाशांसमोरच बेदम मारहाण करून धमकी दिल्याचा प्रकार उघडकीस आला आहे. ही घटना बार्शी-कुर्डूवाडी रस्त्यावरील श्रीप्रसाद हॉटेलच्या बाजुला असलेल्या टाटा शोरूमच्या समोर मंगळवारी (ता. 19) दुपारी सव्वा बारा वाजण्याच्या सुमारास घडली आहे. या प्रकरणी बार्शी शहर पोलीस ठाण्यात सरकारी कामात अडथळा, मारहाण व धमकी दिल्याप्रकरणी गुन्हा दाखल करण्यात आला आहे.
मारूती महादेव काटकर (वय -37, धंदा, नोकरी, एस.टी. बस चालक, रा. जामगाव (पा) ता. बार्शी जि. सोलापूर, सध्या नेम बार्शी आगार, जि – सोलापूर), असे मारहाण झालेल्या एसटी चालकाचे नाव आहे. तर सचिन सुभाष शिंदे (रा. नाईकवाडी प्लॉट, उपळाई रोड, बार्शी ता. बार्शी) असे मारहाण करणाऱ्या दुचाकी चालकाचे नाव आहे. याप्रकरणी मारूती महादेव काटकर यांनी बार्शी शहर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मारूती काटकर हे बार्शी एसटी आगारात मागील तेरा वर्षापासून चालक म्हणून कार्यरत असून चालक क्र. 61130 असा आहे. मंगळवारी दुपारी आगारातून बार्शी ते उपळाई (ठोंगे) या गावाकडे एसटी बस घेऊन निघाले होते. यावेळी काटकर व वाहक नितीन नलवडे हे प्रवाश्यांसह निघाले होते. आगारातून कुर्डूवाडी रोड मार्गे उपळाई (ठोंगे) येथे जात असताना कुर्डूवाडी रस्त्याचे काम सुरु आहे. तसेच सतत पाऊस चालु असल्याने रस्त्यावर पाणी साचुन चिखल झाला होता.
यावेळी एसटी बस चालवत असताना चालक बाजुने एक इसम मोटार सायकलवरून निघाला होता. यावेळी त्याच्या अंगावर रस्त्यावरील खड्ड्यातील साचलेले पाणी उडाले. त्यामुळे दुचाकी स्वाराने त्याची मोटार सायकल एस. टीच्या पुढे घेऊन थांबविली. दुचाकी थांबवल्याने एसटी बस चालक काटकर यांनी एस.टी बस रस्त्याच्या बाजूला घेतली. दुचाकीस्वार हा एस.टी बसच्या केबिनजवळ आला व त्याने केबिनचा दरवाजा उघडुन काटकर यांना शिवीगाळ करण्यास सुरुवात केली व शर्टाला धरून केबीनच्या खाली ओढले.
दरम्यान, खाली ओढल्यानंतर त्याने माझ्या सरकारी गणवेशाच्या शर्टाचा डावा खिसा धरून ओढुन फाडला व तसेच ओढत मला वाहकाकडील दरवाज्याकडे नेऊन पायरीवर पाडले व प्रवाश्याच्या तसेच वाहकासमोर शिवीगाळ करून हाताने लाथाबुक्याने मारहाण केली. तसेच तु येथुन एस.टी कसा घेऊन जातो अशी धमकी देऊन तो तेथुन काहीवेळाने निघुन गेला.
दरम्यान, चालक व प्रवाशांच्या मद्यस्थीनंतर मोटारसायकलस्वार तेथून काही वेळाने निघून गेला. चौकशीअंती त्याची ओळख सचिन शिंदे अशी पटली आहे. याप्रकरणी काटकर यांनी दिलेल्या तक्रारीनुसार सचिन शिंदे याच्यावर बार्शी शहर पोलीस ठाण्यात सरकारी कामात अडथळा, मारहाण व धमकी दिल्याप्रकरणी गुन्हा दाखल करण्यात आला आहे. तपास पोलीस हवालदार कांतीलाल लाड करीत आहेत.
