पुणे : हॉटेलच्या पार्किंगमधून कार बाहेर काढत असताना मागे उभी केलेली कार अडथळा ठरत होती. त्यामुळे पाठिमागील कार चालकाला गाडी बाजूला घेण्यास सांगितले. गाडी बाजूला घ्यायला सांगितले, याचा राग आल्याने तिघांनी एकाला बेदम मारहाण करुन गंभीर जखमी केले. हा प्रकार शनिवारी (ता. १३) रात्री दहाच्या सुमारास वाघोली येथील लेहजा हॉटेलच्या पार्कींगमध्ये घडला. या प्रकरणी लोणीकंद पोलिसांनी तिघांवर गुन्हा दाखल केला आहे.
याबाबत कमलकुमार इंद्रप्रकाश तिवारी (वय ४४, रा. ब्लद आयकॉन सोसायटी, वाघोली) यांनी लोणीकंद पोलीस ठाण्यात रविवारी (ता. १४) फिर्याद दिली आहे. यावरुन गणेश महादेव दरेकर (वय- ४७), आदित्य गणेश दरेकर (वय-१९), शिल्पा गणेश दरेकर (वय-४५) यांच्यावर गुन्हा दाखल केला आहे.
याबाबत पोलिसांनी दिलेल्या माहितीनुसार, फिर्यादी, त्यांचा मुलगा व पती शनिवारी रात्री वाघोली येथील लेहजा हॉटेलमध्ये जेवण करण्यासाठी गेले होते. जेवण झाल्यानंतर फिर्यादी यांचे पती गाडी पार्कींगमधून बाहेर काढत होते. त्यावेळी फिर्यादीच्या मुलाने आरोपी गणेश दरेकर याला कार बाजूला घेण्यास सांगितले. याचा राग आल्याने आरोपीने फिर्यादीच्या मुलाला शिवीगाळ करुन, दमदाटी करत धक्काबुक्की करुन कॉलर पकडली. त्यावेळी फिर्यादी यांचे पती जाब विचारण्यासाठी गेले असता आरोपींनी त्यांच्यासोबत हुज्जत घालून मारहाण केली. या मारहाणीमध्ये फिर्यादी यांच्या पतीचे उजव्या हाताचे बोट फ्रॅक्चर झाले. ते गंभीर जखमी झाल्याचे फिर्यादीत म्हटले आहे.
