-बापू मुळीक
सासवड : महाराष्ट्र विधानसभा सार्वत्रिक निवडणुकीसाठी (दि. 20 नोव्हेंबर) रोजी मतदान होणार आहे. पुरंदर विधानसभा मतदारसंघातील मतदारांना त्यांची मतदान केंद्रे व अनुक्रमांक या तपशीलाची माहिती सुलभरितीने उपलब्ध होण्याकरिता निवडणूक कार्यालयामार्फत बुथ लेव्हल ऑफिसर्स कडून मतदार चिठ्ठ्यांचे वाटप सुरु करण्यात आले. अशी माहिती निवडणूक निर्णय अधिकारी वर्षा लांडगे यांनी दिली.
पुरंदर विधानसभा मतदारसंघांमध्ये एकूण संख्या 4 लाख 64 हजार 17 मतदार असून 418 मतदान केंद्र आहेत. प्रत्येक मतदान केंद्रासाठी स्वतंत्र मतदान केंद्रस्तरीय अधिकाऱ्यांची नेमणूक करण्यात आली आहे. संबंधित मतदान केंद्रांच्या बीएलओमार्फत मतदारांना मतदार चिठ्ठयांचे घरोघरी वाटप करण्यात येत आहे.
मतदारांची मतदान केंद्र व अनुक्रमांक शोधण्याची ऐनवेळी होणारी धावपळ टाळण्यासाठी प्रशासनाने मतदार संघातील 40 पर्यवेक्षकांच्या देखरेखीखाली मतदानापूर्वीच मतदार चिठ्ठया घरपोच करण्याची कार्यवाही एकूण 418 मतदान केंद्रस्तरीय अधिकारी यांच्यामार्फत सुरु आहे. या मतदार चिठ्ठीवर मतदाराची माहिती, मतदान केंद्राचे ठिकाण, मतदानाची तारीख व वेळ यांचा समावेश आहे.
