लोणी काळभोर, (पुणे) : कुंजीरवाडी (ता. हवेली) ग्रामपंचायत हद्दीतील थेऊरफाटा येथील रेल्वे उड्डाणपुलावरील कठड्याला दुचाकी धडकून अपघात झाला. यामध्ये दुचाकीस्वार गंभीर जखमी झाला. हा अपघात शनिवारी (ता. ९) रात्री सव्वा नऊ वाजण्याच्या सुमारास झाला.
अपघातात जखमी झालेल्या तरुणाचे नाव समजले नसून त्याला नागरिकांच्या मदतीने रुग्णालयात दाखल करण्यात आले आहे. या ठिकाणी अपघात झाल्याने वाहतूक कोंडी झाली असून, वाहनांच्या रांगा लागल्या आहेत.
या ठिकाणी असलेले कठडे वाहनचालकांसाठी धोकादायक ठरत असून, कठड्यांना धडकून मोठ्या प्रमाणात अपघात होत आहेत. येथील सततच्या अपघातात अनेकजणांना आपला जीव गमवावा लागला. तरी कित्येकांना गंभीर इजा झाल्याने अपंगत्व आले आहे. त्यामुळे येथील कठड्यावर पिवळा दिवा (ब्लिंकर्स) बसवण्याची मागणी नागरिकांकडून करण्यात येत आहे.
रात्रीच्या वेळी कठडे दिसत नसल्याने वारंवार अपघात
या उड्डाणपुलावर असलेले कठडे धोकादायक बनले असून, रात्रीच्या वेळी हे कठडे दिसत नसल्याने वारंवार अपघात होत आहे. विशेषतः दुचाकीस्वारांना समोरून येणाऱ्या मोठ्या वाहनांची लाईट चमकल्याने कठडे दिसत नाही. परिणामी, बहुतांशी अपघात होत आहेत. त्यामुळे थेऊरफाटा येथील रेल्वे उड्डाणपुलावरील कठडा मृत्यूचा सापळा बनत चालला आहे.
