पुणे : “पालख्यांमुळे रस्ता जाम होतो. हिंदूचे अनेक सण रस्त्यावर साजरे केले जातात. मात्र अशावेळी आम्ही तक्रार करत नाही. पण मुस्लिम समाज दहा मिनिटासाठी रस्त्यावर नमाज पठण करत असेल तर तक्रारी केल्या जातात. उत्तर प्रदेशचे मुख्यमंत्री योगी आदित्यनाथ यांनी तर रस्त्यावर नमाज पठण करणाऱ्याचे पासपोर्ट रद्द करण्याची धमकी दिली आहे.’ असे वक्तव्य समाजवादी पक्षाचे प्रदेशाध्यक्ष अबू आझमी यांनी केलं आहे.

आझमी म्हणाले, ‘मी पुण्यातून येताना मला लोकांनी सांगितलं लवकर जाऊ अन्यथा पालख्यामुळं रस्ता जाम होईल. रस्ता जाम होतोय, पण आम्ही कधी तक्रार केली नाही. आम्ही हिंदू बांधवांच्या सोबत खांद्याला खांदा लावून चालतो. आजपर्यंत कोणत्याही मुसलमान बांधवांनी रस्त्यावर सण साजरे केले, तर त्यावरुन तक्रार दाखल केली जाते. आता वारीमुळे रस्ता जाम होत आहे. तर एकाही मुसलमान बांधवाने तक्रार केली नाही. असं आझमी म्हणाले आहेत.
दोन दिवसांच्या मुक्कामानंतर संत तुकाराम महाराज आणि संत ज्ञानेश्वर महाराज यांची पालखी आज पुण्यातून मार्गस्थ झाली आहे. याचदरम्यान, समाजवादी अबू आझमी यांनी आषाढी वारीबाबत वादग्रस्त वक्तव्य केल्याने राज्यात नव्या वादाला तोंड फुटणार हे नक्की.








