लोणी काळभोर, (पुणे) : पुणे-सोलापूर महामार्गावर लोणी काळभोर ग्रामपंचायत हद्दीत भरधाव ट्रकने एका चारचाकी गाडीला पाठीमागून जोरात धडक दिल्याची घटना घडली आहे. ग्रामपंचायत हद्दीतील शिवशक्ती समोर साडेदहा वाजण्याच्या सुमारास हा अपघात झाला आहे. या अपघातात एक जण गंभीर जखमी झाला असून तिघांना मुक्कामार लागल्याची प्राथमिक माहिती मिळत आहे.
जखमींना लोणी काळभोर येथील विश्वराज हॉस्पिटलमध्ये उपचारासाठी दाखल करण्यात आले आहे. जखमी व्यक्ती हे लोणी काळभोर येथील कुशल वाटिका या वसाहतीत राहत असल्याची खात्रीदायक माहिती मिळाली आहे.
मिळालेल्या माहितीनुसार, चारचाकी गाडीतील व्यक्ती हे लोणी काळभोर ग्रामपंचायत हद्दीतील कुशल वाटिका या वसाहतीत राहतात. संध्याकाळी साडेदहा वाजण्याच्या सुमारास पुणे- सोलापूर महामार्गावरून कुशल वाटिका या वासहतीकडे जाण्यासाठी रस्त्याच्या दुभाजकावरून वळण घेत होते. यावेळी पाठीमागून येणाऱ्या एका टँकरने चारचाकीला पाठीमागून जोरात धडक दिली.
दरम्यान, या अपघातात एकजण गंभीर जखमी झाला आहे. या अपघातानंतर रस्त्यावर नागरिकांनी मोठी गर्दी केली होती. तर सोलापूर बाजूकडे जाणारी वाहतूक खोळंबली होती.
