पुणे : सिंहगड घाटात पर्यटकांना घेऊन जाणारी जीप उलटून अपघात झाला. यामध्ये १० ते १२ जण जखमी झाल्याची माहिती समोर येत आहे. सिंहगड घाट रस्त्यावरुन रविवारी सायंकाळी पाचच्या सुमारास पर्यटकांना घेऊन जीप पायथ्याकडे निघाली होती. वळणावर जीप अचानक उलटली. तेथून जाणाऱ्या अन्य वाहनचालकांनी जीपमधील पर्यटकांना बाहेर काढले. सुदैवाने यात कोणतीही जीवितहानी झाली नसली तरी अनेक जण जखमी झाले आहेत. त्यांच्यावर खासगी रुग्णालयात उपचार सुरू आहेत. जीपचालकाचे नियंत्रण सुटल्यामुळे हा अपघात घडला असावा, अशी शक्यता पोलिसांनी व्यक्त केली.
अपघाताची माहिती मिळाल्यानंतर पोलीस आणि वन विभागाचे अधिकारी तातडीने घटनास्थळी दाखल झाले. जखमींना तत्काळ रूग्णालयात हलविण्यात आले. दरम्यान, सिंहगड घाट रस्त्यावर अनेकदा अपघात घडतात. येथील वळण धोकादायक ठरत आहे. पर्यटकांना पायथ्यावरून गडापर्यंत आणि पुन्हा खाली नेण्यासाठी जीप वाहतूक सेवा सुरू करण्यात आली आहे. मात्र, हीच वाहतूक जीवघेणी ठरत आहे. रविवारी संध्याकाळी सिंहगड घाट रस्त्यावरील अकरा हजार वळणाजवळ उलटली. यावेळी जीपमध्ये बारा ते पंधरा पर्यटक होते. जीप उलटून बरेच जण खाली कोसळले आणि जखमी झाले. प्रसंगावधान राखत अन्य वाहनचालकांनी तातडीने वाहने थांबवून अपघातग्रस्त जीपमधील पर्यटकांना बाहेर काढले. या अपघाताची माहिती मिळाल्यावर वन विभागाचे अधिकारी तसेच पोलिसही घटनास्थळी दाखल झाले.
दरम्यान, रविवारी सकाळी सिंहगड किल्ल्यावर विद्यार्थ्यांची सहल आली होती. विद्यार्थ्यांना गडावर घेऊन आलेल्या जीपचा गाडीतळाजवळील तीव्र उतारावर ब्रेक निकामी झाला. अपघातात एक विद्यार्थी जखमी झाला, अशी माहिती वनविभागातील अधिकाऱ्यांनी दिली. सिंहगड घाट रस्त्यावर रविवारी दिवसभरात दोन अपघात झाले. या दुर्घटनेमुळे सिंहगड घाट रस्त्यावरील वाहतूक नियोजन व नियमनाचा प्रश्न ऐरणीवर आला आहे.
पर्यटकांना पायथ्यावरुन गडापर्यंत नेण्यासाठी जीपचा वापर करण्यात येतो. प्रवासी वाहतूक करणारी वाहने सुस्थितीत नसतात. सिंहगड घाट रस्त्यावर प्रवासी वाहतूक करणाऱ्या वाहनांची तपासणी करुन कारवाई करण्यासाठी वनविभागाने प्रादेशिक परिवहन विभागाला (आरटीओ) पत्र दिले होते. मात्र, अद्याप कारवाई करण्यात आली नाही. धोकादायक पद्धतीने प्रवासी वाहतूक करणाऱ्या वाहनांवर कारवाई करावी, असे पत्र पुन्हा आरटीओकडे देण्यात येणार असल्याचे वनरक्षक बळीराम वायकर यांनी सांगितले.
