पुणे : प्रियकराच्या मानसिक छळाला कंटाळून एका २१ वर्षीय तरुणीने राहत्या घरात्या घरात गळफास घेऊन आत्महत्या केल्याचा धक्कादायक प्रकार १६ डिसेंबर रोजी घडला. या प्रकरणी प्रियकरावर तळेगाव एमआयडीसी पोलीस ठाण्यात आत्महत्येस प्रवृत्त केल्याचा गुन्हा दाखल केला आहे. आरोपी मागील अडीच ते तीन महिन्यांपासून तरुणीला त्रास देत असल्याचे पोलीस तपासात निष्पन्न झाले.
याबाबत मिळालेल्या अधिक माहितीनुसार, अनिषा रणजीत खंडागळे (वय २१) असे आत्महत्या करणाऱ्या तरुणीचे नाव आहे. याबाबत अनिषा हिच्या आईने रविवारी (ता. २४) तळेगाव एमआयडीसी पोलीस ठाण्यात फिर्याद दिली आहे. यावरुन अभिजीत अनिल राठोड (रा. सायन हॉस्पिटल, कामगार चाळ, मुंबई) याच्यावर गुन्हा दाखल केला आहे.
पोलिसांनी दिलेल्या माहितीनुसार, आरोपीने फिर्यादीच्या मुलीसोबत गोड बोलून तिचा विश्वास संपादन केला. तिच्याशी प्रेमाचे खोटे नाटक केले, त्यानंतर तिला लग्न करण्याचे आश्वासन दिले. मात्र, नंतर फसवणूक केली. आरोपीने तिच्या चारित्र्यावर संशय घेऊन तिला भेटून काही वेळा फोनवरुन शिवीगाळ केली. त्यानंतर तिचा फोन ब्लॉक करुन तिच्यासोबत बोलणे बंद केले.
दरम्यान, आरोपी राठोड याने तरुणीचा मानसिक छळ केला. लग्नाचे आश्वासन देऊन ऐनवेळी लग्नास नकार दिला. या प्रकारामुळे तरुणीला नैराश्य आले. याच नैराश्यातून तिने राहत्या घरी ओढणीने गळफास घेत आत्महत्या केली.
