दौंड : दौंड रेल्वे स्टेशन परिसरात पेट्रोल वाहतूक करणाऱ्या मालगाडीचा एक टँकर घसरल्याची घटना बुधवारी (ता. १४) सकाळी पावणेनऊ वाजण्याच्या सुमारास घडली आहे. दौंड रेल्वे उड्डाण पुलाजवळ हा अपघात झाला आहे. या अपघातात कोणतीही जीवितहानी झाली नाही.
मिळालेल्या माहितीनुसार, दौंड रेल्वे उड्डाणपुलाजवळ मनमाड-नगर-दौंड लोहमार्गावरून एक इंधन वाहतूक करणारी मालगाडी दौंड रेल्वे यार्डमध्ये प्रवेश करताना सकाळी पावणेनऊ वाजण्याच्या सुमारास एका टँकरचे चाक लोहमार्गावरून घसरले.
दरम्यान, आपत्कालीन परिस्थितीत वाजविले जाणारे भोंगे तत्काळ वाजविण्यात आले. या वेळी डब्याची चाके पूर्ववत लोहमार्गावर आणण्यासाठी रेल्वेकडून उपाययोजना सुरू होत्या. रेल्वेचे वरिष्ठ अधिकारी, दौंड लोहमार्ग पोलीस, रेल्वे सुरक्षा दलाचे वरिष्ठ घटनास्थळी दाखल झाले होते.
