देऊळगाव राजे : हिंगणीबेर्डी येथे मध्यरात्रीच्या सुमारास बिबट्याने गाई-म्हशींच्या वासरांवर जीवघेणा हल्ला केला. या हल्ल्यात एक वासरू जागीच ठार झाले असून, तीन वासरे गंभीर जखमी झाली आहेत.
माजी उपसरपंच प्रकाश ढवळे यांचा गावालगत जनावरांचा गोठा आहे. गोठ्यातील तीन वासरांवर सोमवारी (ता. ११) रात्री १२ ते ३ च्या सुमारास बिबट्याने हल्ला केला. त्यात वासरू जागीच ठार झाले असून, दोन पारडी गंभीर जखमी झाली आहेत. शेजारील चंद्रकांत ढवळे यांच्या गोठ्यातील वासरावर देखील बिबट्याने हल्ला केला आहे.
मलठण येथे पंधरा दिवसांपूर्वी बिबट्याने गाईची शिकार केली होती. शेती काम करणाऱ्या शेतकरी व शेतमजुरांना दिवसाढवळ्या बिबट वावरताना दिसत आहे. या भागात बिबट्यांची संख्या किती आहे, हे अजून वनविभागाकडून स्पष्ट करण्यात आलेले नाही. मात्र, हल्ल्यामुळे परिसरातील नागरिक भयभीत झाले असून, पिंजरा लावून बिबट्याचा बंदोबस्त करण्याची मागणी होत आहे.
याबाबत वनविभागाकडून अद्याप ठोस उपाययोजना होताना दिसत नाही. याबाबत तालुका वनपरिक्षेत्र अधिकारी कल्याणी गोडसे यांच्याशी संपर्क साधला असता, नुकसान झालेल्या संबंधित शेतकऱ्यांना नुकसानभरपाई देण्यात येईल असे सांगण्यात आले. पिंजरा लावण्यासाठी वरिष्ठ कार्यालयाकडे मागणी केल्याचेही त्यांनी स्पष्ट केले.
