लोणी काळभोर, (पुणे) : पुणे – सोलापूर महामार्गावर दुचाकीस्वाराला अज्ञात वाहनाने दिलेल्या धडकेत एका ४० वर्षीय व्यक्तीचा जागीच मृत्यू झाल्याची घटना घडली आहे. कुंजीरवाडी (ता. हवेली) ग्रामपंचायत हद्दीतील थेऊर फाटा परिसरात मंगळवारी (ता. १९) रात्री दहा वाजण्याच्या सुमारास ही घटना घडली आहे.
विकास रामदास धुमाळ (वय- ४०, रा. धुमाळमळा, कुंजीरवाडी, ता. हवेली) असे अपघातात मृत्यू झालेल्या व्यक्तीचे नाव आहे. याप्रकरणी त्यांचे बंधू प्रकाश धुमाळ यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात वाहनचालकावर गुन्हा दाखल करण्यात आला आहे.
पोलिसांनी दिलेल्या माहितीनुसार, विकास धुमाळ हे राहत्या घरातून दुचाकीवरून जात असताना रात्री दहा वाजण्याच्या सुमारास थेऊरफाटा येथे त्यांच्या दुचाकीला अज्ञात वाहनाने जोरदार धडक दिली. या अपघातात धुमाळ यांच्या डोक्याला तसेच शरीराला गंभीर जखमा झाल्या होत्या.
त्यांना उपचारासाठी रुग्णालयात दाखल करण्यात आले, मात्र उपचारापूर्वीच त्यांचे निधन झाल्याची माहिती डॉक्टरांनी दिली. याप्रकरणी प्रकाश धुमाळ यांनी दिलेल्या तक्रारीनुसार अज्ञात वाहनचालकावर गुन्हा दाखल करण्यात आला असून पुढील तपास पोलीस उपनिरीक्षक अमोल घोडके करीत आहेत.
