पुणे : पुण्यात ब्लॅक मॅजिक करून आघोरी कृत्य करीत पैशांचा पाऊस पडतो, असे सांगत तरुणाला १८ लाख रुपयांना लुटण्यात आल्याची घटना उघड झाली आहे. ही घटना शनिवार २ डिसेंबर रोजी रात्री पावणे बाराच्या सुमारास हडपसरमधील ससाने नगरमध्ये घडली. याबाबत हडपसर पोलिसांनी गुन्हा दाखल केला आहे.
किशोर पांडागळे (रा. एनडीए रोड, उत्तम नगर, वारजे), बाबा आयरा शाब (रा. बदलापूर, ठाणे), माधुरी मोरे, रॉकी वैद्य (रा. बदलापूर, ठाणे) अशी आरोपींची नावे आहेत. या प्रकरणी विनोद छोटेलाल परदेशी (वय ४३, रा. रामनगर, हडपसर) यांनी हडपसर पोलीस ठाण्यात फिर्याद दिली आहे. परदेशी यांचा प्लास्टिक मोल्डिंग आणि कन्स्ट्रक्शनचा व्यवसाय आहे. सदर आरोपींनी संगणमत करून विशाल बिनावत यांच्या घरी फिर्यादीला बोलवले. त्या ठिकाणी परदेशी यांना आम्ही पैशांचा पाऊस पाडतो, असे खोटे सांगितले. त्यांना यामधून खूप पैसे मिळवून देण्याचे आमिष दाखवत त्यांच्याकडून १८ लाख रुपयांनी भरलेली पैशाची बॅग घेत हे सर्व आरोपी पसार झाले. गुन्हा दाखल झाल्यानंतर आरोपींचा शोध सुरू करण्यात आला आहे. पुढील तपास सहाय्यक पोलीस निरीक्षक विजयकुमार शिंदे करीत आहेत.
