Sanjay Raut : मुंबई : मुख्यमंत्री एकनाथ शिंदे यांच्या मुलाच्या आदेशानंतर बाळासाहेबांच्या फोटोवर हातोडा चालवण्यात आला. बाळासाहेबांच्या फोटोला हातोडा मारण्याचे आदेश ‘वर्षा’वरून आले होते. कुणाच्या फोटोला हातोडे मारतोय हे देखील या दिवट्यांना कळत नाही. हे कसले शिवसैनिक? हे तर निर्लज्ज आणि नीच आहेत. बाळासाहेबांसाठी अनेक खटले अंगावर घ्यायला आम्ही तयार आहोत. बाळासाहेबांच्या फोटोवर हातोडा चालवणारे हे लोक नकली आणि ड्युप्लिकेटच आहेत, असा घणाघात संजय राऊत यांनी केला आहे. (Sanjay Raut)
बाळासाहेबांच्या फोटोवर हातोडे मारणाऱ्यांनी शिवसेना आणि बाळासाहेबांचं नाव घेऊ नये. त्यांना तो अधिकार नाही. ज्या बाळासाहेबांच्या नावावर आपण जंगलात वाढलात, मोठे झालात, त्यांच्याच नावावर राज्याचं मुख्यमंत्रिपद मिळवलं. त्यांच्या फोटोवर हातोडा चालवण्याचे आदेश देता? तुम्हाला काहीही वाटत नाही?, असा सवाल संजय राऊत यांनी विचारला आहे. (Sanjay Raut)
दरम्यान, या सर्व प्रकारानंतर मनसेचे नेते संदीप देशपांडे यांनी संजय राऊतांना प्रतिप्रश्न केला आहे. संदीप देशपांडे म्हणाले की, बाळासाहेबांच्या फोटोवर हातोडा मारला त्याच्या कानशिलात लगावली हे आम्हाला एकदम मान्य आहे. पण बाळासाहेबांसारख्या मोठ्या नेत्याला “म्हातारा” असं संबोधणाऱ्या सुषमा अंधारे तुमच्या लोकप्रिय नेत्या कशा, असा प्रश्न संदीप देशपांडे यांनी विचारला आहे. (Sanjay Raut)
बीआरएसच्या महाराष्ट्रातील शक्तीप्रदर्शनावर देखील संजय राऊत यांनी भाष्य कले आहे. संजय राऊत म्हणाले की, तेलंगणाचे मुख्यमंत्री के. चंद्रशेखर राव हे शक्तीप्रदर्शन करण्यासाठी महाराष्ट्र दौऱ्यावर आले आहेत. सोबत पूर्ण मंत्रिमंडळ आणि सहाशे गाड्यांचा ताफा… हे लक्षण म्हणजे पैशांचे आणि सत्तेचे ओंगळवाणे प्रदर्शन आहे.
दरम्यान, ही भाजपची टीम बी म्हणायला हरकत नाही. आपण महाराष्ट्रात शक्ती प्रदर्शन करत असताना दिल्लीत तुमचा पक्ष फुटला आहे, हे पहा, असा टोला संजय राऊत यांनी लगावला. हे शक्ती प्रदर्शन तुम्ही कुणाला दाखवत आहात?, असा सवाल देखील संजय राऊत यांनी उपस्थित केला आहे.
