गुजरात : भारतीय क्रिकेटचा स्टार अष्टपैलू खेळाडू रविंद्र जडेजाच्या पत्नीला भाजपकडून गुजरात निवडणुकीत तिकीट देण्यात आले असून जामनगर उत्तर मधून त्या निवडणुकीला सामोरे जाणार आहेत.
गुजरात विधानसभा निवडणुकीचे बिगुल वाजले असून निवडणूक प्रक्रिया दोन टप्प्यांमध्ये पूर्ण होणार आहे. या पार्श्वभूमीवर भारतीय जनता पक्षाच्या वतीने गुजरात विधानसभा निवडणुकीसाठी ८४ उमेदवारांची नावे जाहीर करण्यात आली. भाजप नेते भूपेंद्र यादव आणि गुजरात भाजपचे प्रदेशाध्यक्ष सी. आर. पाटील यांनी ही जाहीर केली आहे.
भारतीय जनता पक्षाने गुरुवारी आगामी गुजरात निवडणुकीसाठी आपले उमेदवार जाहीर केले. या निवडणुकीत भाजपकडून भारतीय क्रिकेटर रविंद्र जडेजा यांची पत्नी रिवाबा जडेजा यांना जामनगर उत्तर या मतदारसंघातून उमेदवारी देण्यात आली आहे. विधानसभेच्या एकूण १८२ जागांसाठी मतदान होणार आहे. यासाठी दोन टप्प्यामध्ये निवडणूक होणार आहे. पहिला टप्पा १ आणि दुसरा टप्पा ५ डिसेंबर असणार आहे. तर मतमोजणीही ८ डिसेंबरला होणार आहे.
मुख्यमंत्री भूपेंद्र पटेल हे घाटलोडिया मतदारसंघातून निवडणूक लढवणार आहेत. मोरबीचे माजी आमदार कांतीलाल अमृत्या ज्यांनी पूल कोसळल्यानंतर लोकांना वाचवण्यासाठी नदीत उडी मारली होती, त्यांनाही भाजपने उमेदवारी जाहीर केली आहे. संभाव्य उमेदवारांमध्ये सामील होण्यासाठी काँग्रेसला सोडचिठ्ठी देणाऱ्या हार्दिक पटेल आणि अल्पेश ठाकोर यांच्यासोबत भाजपच्या केंद्रीय निवडणूक समितीची बुधवारी झालेल्या बैठकीनंतर ही यादी समोर आली आहे. तर पंतप्रधान नरेंद्र मोदी, केंद्रीय गृहमंत्री अमित शहा, गुजरातचे मुख्यमंत्री भूपेंद्र पटेल, भाजपचे अध्यक्ष जेपी नड्डा आणि इतर प्रमुख नेते पक्षाच्या मुख्यालयात झालेल्या बैठकीला उपस्थित होते.
पाच वर्षांपूर्वी अत्यंत चुरशीच्या झालेल्या गुजरात निवडणुकीत भाजपने ९९ जागा जिंकल्या होत्या आणि प्रमुख प्रतिस्पर्धी काँग्रेसला ७७ जागा मिळाल्या होत्या. तर हार्दिक पटेल आणि अल्पेश ठाकोर यांना पक्षाचे तिकीट मिळण्याची शक्यता असल्याचे वृत्त पीटीआय या वृत्तसंस्थेने दिले होते. अहमदाबादमधील विरमगाममधून पटेल यांना उमेदवारी दिली जाऊ शकते.
दरम्यान, गुजरातचे माजी मुख्यमंत्री विजय रुपाणी आणि माजी उपमुख्यमंत्री नितीन पटेल आणि भूपेंद्रसिंह चुडासामा, प्रदिपसिंह जडेजा या इतर दोन ज्येष्ठ नेत्यांनी ते आगामी विधानसभा निवडणूक लढवणार नाहीत, असे जाहीर केले आहे.
