सुरेश घाडगे
परंडा : राज्याचे आरोग्य तथा कुटुंब कल्याण मंत्री डॉ. तानाजी सावंत यांनी शुक्रवारी (ता. १६) नगर परिषद येथील लोकनेते गोपीनाथ मुंडे सभागृहात जनता दरबार आयोजित केला आहे. यामध्ये महसूल, ग्रामविकास, महावितरण, आरोग्य, सहकार, शिक्षणासह अनेक विभागाशी संबंधित लोकांच्या तक्रारींवर डॉ. सावंत सुनावणी घेणार आहेत.
मिळालेल्या माहितीनुसार, संबंधित विभागाचे सर्व उच्च अधिकारी जनता दरबारात उपस्थित राहणार आहेत. गेल्या आठवड्यात परंडा तहसील कार्यालयात मंगळवारी (ता. ०६) झालेल्या जनता दरबारात मंत्री डॉ. सावंत यांनी जनतेच्या समस्या ऐकल्या होत्या. त्यावर तातडीने उपाययोजना करण्याचे निर्देश त्यांनी संबंधित विभागांना दिले होते.
मराठवाडा मुक्ती संग्राम दिनाच्या अगोदर जनता दरबार घेणार असून या जनता दरबारात पूर्वीचे प्रश्न मार्गी लावले का हे विचारणार असल्याचे अधिकाऱ्यांना त्यांनी त्यावेळी बजावून सांगितलं होते. याच पार्श्वभूमीवर नगर परिषद येथील लोकनेते गोपीनाथ मुंडे सभागृहात ते जनता दरबार घेत आहेत.
