लोणी काळभोर (पुणे) : दौंड मतदार संघात येत्या महिनाभरात मोठ्या कार्यक्रमाचे आयोजन करण्यात आले आहे. तो कार्यक्रम व कदमवाकवस्ती ग्रामपंचायतीच्या ८९ कोटी ९७ लक्ष रुपयांच्या उद्घाटनाचा कार्यक्रम उपमुख्यमंत्री देवेंद्र फडणवीस यांच्या हस्ते होणार आहे. असे प्रतिपादन दौंडचे आमदार राहुल कुल यांनी केले.
कदमवाकवस्ती (ता. हवेली) ग्रामपंचायतीला जल जीवन मिशन कार्यक्रमांतर्गत ८९ कोटी ९७ लक्ष रुपयांच्या निधीची शासकीय मंजुरी मिळाली आहे. त्यातील पहिल्या पाच गाड्यामधून पाणीपुरवठा करणाऱ्या पाईपने भरलेल्या गाड्यांचे स्वागत कदमवाकवस्ती (ता. हवेली) ग्रामपंचायत हद्दीतील कवडीपाट टोलनाका परिसरात करण्यात आले. यावेळी आमदार राहुल कुल बोलत होते.
यावेळी कदमवाकवस्तीच्या सरपंच गौरी गायकवाड, माजी सरपंच गणपत काळभोर, नवपरिवर्तन फाऊंडेशनचे अध्यक्ष चित्तरंजन गायकवाड, ग्रामपंचायत सदस्य नासीर पठाण, सचिन दाभाडे, राजश्री काळभोर, सविता साळुंके, अविनाश बडदे, दीपक काळभोर, समीर शेंडगे, माउली काळभोर, गौरव काळभोर, विकी नामुगडे, आदी मान्यवर उपस्थित होते.
कदमवाकवस्तीसारख्या मोठ्या ग्रामपंचायतीच्या पाणीपुरवठा योजनेचे नियोजन अतिशय बारकाईने करून हद्दीतील नागरिकांपर्यंत पाणी पोहचविण्याचे काम करावे लागते. या पाणीपुरवठ्यामुळे नागरिकांनी पाणी टंचाईच्या झळा सोसल्या आहेत. त्या कायमच्या दूर होण्यास मदत होणार आहे.
कदमवाकवस्तीच्या सरपंच गौरी गायकवाड म्हणाल्या, “कदमवाकवस्ती ग्रामपंचायतिची भिषण पाणीटंचाई लवकरच दूर होणार आहे. जल जीवन मिशन कार्यक्रमांतर्गत अटी व शर्तीची पूर्तता करण्याच्या अधीन राहून प्रशासकीय मान्यता देण्यात आली आहे. संबंधित विभागाच्या अधिकाऱ्यांनी पाहणी केली आहे. काम पुर्ण करण्याचा क्रम (वर्क ऑर्डर) झाला असून येणाऱ्या महिन्यात या कामाचा शुभारंभ होणार आहे. एक महिन्याच्या आत हि योजना सुरु होणार आहे.”
