शिरुर : जनतेचा नेता म्हणून माजी आमदार बाबुराव पाचर्णे यांनी या भागातील समाजासाठी कार्यकर्त्याप्रमाणे काम केले. त्यांनी जीवनात अनेकांचे भले केले, अनेकांत सकारात्मकता निर्माण केलेली असल्याने ते देखील आजारावर मात करून लवकरच बरे होतील. असा विश्वास उपमुख्यमंत्री देवेंद्र फडणवीस यांनी व्यक्त केला आहे.
भाजपाचे ज्येष्ठ नेते व शिरूर-हवेलीचे माजी आमदार बाबुराव पाचर्णे हे मागील काही दिवसापासून आजरी आहेत. त्यांच्यावर शिरूर येथील एका खाजगी रुगणालयात उपचार सुरु असून मंगळवारी (ता. १०) रात्री साडेनऊ वाजण्याच्या सुमारास रुगणालयात भेट घेऊन त्यांच्या तब्बेतीची विचारपूस केली. यावेळी फडणवीस यांनी हा विश्वास व्यक्त केला.
यावेळी मंत्री चंद्रकांत दादा पाटील, माजी मंत्री बाळा भेगडे, आमदार ॲड. अशोक पवार, आमदार भीमराव तापकीर, राहुल कुल, माधुरी मिसाळ, सुनिल कांबळे, जिल्हा परिषदेचे माजी अध्यक्ष प्रदीप कंद, भाजपचे जिल्हाध्यक्ष गणेश भेगडे यांच्या समवेत त्यांची भेट घेतली. भाजपचे तालुकाध्यक्ष आबासाहेब सोनवणे, दादा पाटील फराटे यावेळी उपस्थित होते. दुपारी ज्येष्ठ समाजसेवक अण्णा हजारे यांनी तर माजी गृहमंत्री दिलीप वळसे पाटील, युवा उद्योगपती प्रकाश धारिवाल यांनीही पाचर्णे यांची भेट घेऊन त्यांच्या तब्येतीची विचारपूस केली होती.
या भेटीनंतर फडणवीस यांनी पाचर्णे यांच्या पत्नी मालती, मुलगा राहुल, मुलगी राणीताई, सून मेघना व पाचर्णे यांच्या बहिणींचीही आवर्जून भेट घेतली. पाचर्णे यांचे पक्षकार्यात व एकूणच समाजकारणात मोठे योगदान असून, आम्ही तुम्हा कुटूंबियांच्या पाठिशी ठामपणे उभे आहोत, अशा शब्दांत फडणवीस यांनी पाचर्णे कुटूंबियांना दिलासा दिला.
यापुढे बोलताना फडणवीस म्हणाले, ” राज्यात आमचे सरकार आले असल्याने, पाचर्णे हे पुन्हा पूर्वीप्रमाणे बरे होऊन कार्यरत होतील आणि शिरूर तालुक्यातील विकासकामांसाठी माझ्याकडे, चंद्रकांतदादांकडे आग्रह धरतील. आम्ही देखील त्यांचा विकासकामांचा आग्रह पूर्णत्वास नेऊ.
