पिंपरी-चिंचवड : चिंचवड विधानसभा पोटनिवडणुकीची रणधुमाळी सुरु असतानाच आता भाजपच्या एका बड्या नेत्याने राजीनामा देल्याने भाजपला मोठा धक्का बसला आहे.
पिंपरी निखल परिसरातील भारतीय जनता पक्षाचे युवा नगरसेवक तुषार कामटे यांनी आपल्या सदस्यपदाचा राजीनामा दिला आहे. दरम्यान, गेल्या वर्षी तुषार कामटे यांनी आपल्या नगरसेवक पदाची कारकीर्द पूर्ण होण्याअगोदरच नगरसेवक पदाचा मुदतपूर्व राजीनामा दिला होता.
दरम्यान, पिंपरी-चिंचवड महापालिकेत भाजप करत असलेला भ्रष्टाचाराला कंटाळून मी माझ्या नगरसेवक पदाचा राजीनामा देत आहे, असा आरोप तुषार कामटे यांनी केला होता. आता त्यांनी थेट भाजपच्या सदस्यपदाचा राजीनामा दिला आहे.
चिंचवड विधानसभा पोटनिवडणुकीत भाजपाच्या उमेदवार अश्विनी लक्ष्मण जगताप यांच्याविरुद्ध महाविकास आघाडीचे अधिकृत उमेदवार नाना उर्फ विठ्ठल काटे मैदानात उतरले आहेत. निवडणुकीत आपलाच उमेदवार निवडून यावा, यासाठी दोन्ही पक्षांकडून रणनिती आखण्यात येत आहे. अशातच पोटनिवडणुकीपूर्वी तुषार कामटे यांनी राजीनामा दिल्याने भाजपला अजून एक मोठा धक्का बसला आहे.
