हडपसर, ता.२८ : हडपसरच्या जनतेच्या हितासाठी, नागरी प्रश्नांसाठी सातत्याने संघर्ष करणाऱ्या नगरसेवक योगेशबापू ससाणे यांनी १०६ फूट उंचीचा तिरंगा ध्वज स्तंभ स्वखर्चाने उभारून नव्या पिढीत राष्ट्रप्रेम जागृत करण्याचे काम केल्याचे उपमुख्यमंत्री अजित पवार यांनी ससाणेनगर येथे सांगितले.
नगरसेवक योगेशबापू ससाणे यांनी स्वखर्चातून ससाणेनगरमध्ये उभारलेला १०६ फूट उंचीचा तिरंगा ध्वज स्तंभाचा लोकार्पण सोहळा आज आयोजित केला होता. यावेळी अजित पवार हे प्रमुख पाहुणे म्हणून बोलत होते. यावेळी आमदार चेतन तुपे पाटील, श्रीनाथ म्हस्कोबा साखर कारखान्याचे चेअरमन पांडुरंग राऊत, कार्यकारी चेअरमन विकास रासकर, शिवसेना शहर प्रमुख प्रमोद भानगिरे, माजी महापौर राजलक्ष्मी भोसले, वैशाली बनकर, माजी उपमहापौर बंडुतात्या गायकवाड, माजी सभापती सचिन घुले, संदीप तुपे, आरपीआय नेत्या शशिकला वाघमारे, राष्ट्रवादी विधानसभा प्रमुख डॉ. शंतनू जगदाळे, माजी नगरसेवक सोपान गोंधळे आदी मान्यवर उपस्थित होते.
ससाणेनगरमध्ये ढोलताशांच्या गजरात उपमुख्यमंत्री अजित पवार यांचे स्वागत करण्यात आले. छत्रपती शिवाजी महाराज यांच्या पुतळ्यास पुष्पहार अपर्ण केल्यानंतर नगरसेवक योगेशबापू ससाणे यांच्या संकल्पनेतून साकारलेल्या स्व.डॉ समीर बोराटे पथ नामफलकाचे उद्घाटन अजित पवार यांच्या हस्ते झाले.
यावेळी बोराटे परिवाराकडून त्यांचे स्वागत करण्यात आले त्यांनतर १०६ फूट उंच ध्वज स्तंभाचे उद्घाटन झाले. राष्ट्रगीत, परेड, सलामी न्यू इंग्लिश स्कुलच्या तसेच वर्धमान इग्लिश स्कुल व माळीण बाई प्रशालेच्या विद्यार्थ्यांनी दिली. यावेळी सर्वानी ‘भारत माता की जय, वंदे मातरम’चा जयघोष केला. फुले पगडी, उपरणे, राधा कृष्ण प्रतिमा, भगवदगीता देऊन अजित पवार उपमुख्यमंत्री झाल्याबद्दल योगेशबापू आणि मान्यवरांच्या हस्ते सन्मान करण्यात आला.
आर्यनमॅन डॉ. शंतनू जगदाळे, सायकलपटू चंद्रकांत हरपले यांच्यासह मनपा अतिरिकत आयुक्त विकास ढाकणे व मनपा उपायुक्त संदीप कदम तसेच एमपीएससी परीक्षा उत्तीर्ण होऊन पीएसआयपदी निवड झालेल्या विद्यार्थ्यांचा तसेच रनर राजेश पाटील, किरण घुले, राजु पोतदार आदींचा सन्मान यावेळी अजित पवार यांच्या हस्ते करण्यात आला.
कार्यक्रमाचे प्रास्ताविक करताना नगरसेवक योगेश ससाणे यांनी वाहतूक कोंडी, सोलापुर रोडला पर्यायी रस्ते, ससाणे नगर रेल्वे भुयारी मार्ग, पाणी टंचाई, हडपसर भाजी मंडईचे विस्तारीकरण, बेबी कॅनॉलवरुन रोड अथवा मेट्रो प्रकल्प, हडपसर विधानसभा मतदारसंघांतील सुमारे ६ ठिकाणचे विविध अंडरपास, रामटेकडी कचरा प्रकल्प या गंभीर प्रश्नाकडे अजित पवार यांचे लक्ष वेधत विविध उपाययोजना राबवण्याची मागणी यावेळी केली.
विशेष बाब म्हणजे जवळपास सुमारे ३० माजी नगरसेवक, स्वीकृत नगरसेवक यांना बोलावून योगेश ससाणे यांनी या सर्वांची नावे कोनशिलेवर टाकुन सन्मानित केले. तसेच आगामी मोठ्या निवडणुकीसाठी बेरजेचे राजकारण केल्याची चर्चा कार्यक्रमस्थळी सुरू होती.
तसेच राष्ट्रवादीच्या दोन्ही गटातील वरिष्ठ नेत्याचे फोटो लावून दोन्ही गटांना समांतर ठेवण्याची कला साधल्याची खमंग चर्चा कार्यक्रमस्थळी दिसून आली. यावेळी आभार माजी नगरसेवक सुनील बनकर यांनी मानले. कार्यक्रम यशस्वी होण्यासाठी योगेशबापू ससाणे मित्रपरिवार आणि सावली फाउंडेशनच्या सदस्यांनी परिश्रम घेतले.
