मुंबई: भाजपचे नेते व राष्ट्रीय महामंत्री विनोद तावडे यांच्या मातोश्री विजया श्रीधर तावडे (वय -८५) यांचे आज सोमवारी (ता.१०) संध्याकाळी ७ वाजून ५० मिनिटांच्या सुमारास निधन झाले आहे.
विजया तावडे गेल्या अनेक दिवसांपासून आजाराने त्रस्त होत्या. त्यांच्यावर मुंबईतील एका रुग्णालयात उपचार सुरू होते. उपचारादरम्यान त्यांची आज प्राणज्योत मालवली.
स्वातंत्र्यवीर विनायक दामोदर सावरकर गौरव यात्रेचं भाजपकडून राज्यभरात आयोजन केलं आहे. आज पुण्यात विनोद तावडे हे सावरकर यात्रेत सहभागी होते. सावरकर यात्रेचा समारोपाच्या वेळी तावडे हजर होते. त्याचवेळी आई विजया तावडे यांच्या निधनाची बातमी आली. आईच्या निधनाची बातमी कळताच विनोद तावडे हे तातडीने मुंबईकडे रवाना झाले आहे.
दरम्यान, विजया तावडे यांच्यावर उद्या मंगळवारी (ता.११) सकाळी ९ वाजण्याच्या सुमारास अंत्यसंस्कार करण्यात येणार आहेत.
