उत्तर प्रदेश: उत्तर प्रदेशमध्ये 2027 मध्ये विधानसभा निवडणुका होणार आहेत. निवडणुकीच्या पार्श्वभूमीवर सत्ताधारी भारतीय जनता पक्षापासून (भाजप) ते प्रमुख विरोधी पक्ष असलेल्या समाजवादी पक्षासह (सपा) इतर पक्षांनीही आपापल्या तयारीला वेग दिला आहे. एकीकडे भाजपचा दावा आहे की, उत्तर प्रदेशमध्ये सलग तिसऱ्यांदा त्यांचे सरकार सत्तेवर येईल. तर सपा प्रमुख अखिलेश यादव यांचा दावा आहे की, यावेळी ते उत्तर प्रदेशातील भाजपचा विजयरथ रोखतील. त्यामुळे पानाच्या टपरीपासून ते एसी असलेल्या कार्यालयांपर्यंत सध्या एकच प्रश्न चर्चेत आहे. यावेळी उत्तर प्रदेशमध्ये कोणाचे सरकार येणार?
याचदरम्यान ‘वोट वाइब’ने उत्तर प्रदेशातील नागरिकांसमोर काही प्रश्न ठेवून सर्वेक्षण केले. या सर्वेक्षणाच्या माध्यमातून सध्या उत्तर प्रदेशमध्ये कोणत्या पक्षाला आघाडी मिळत आहे, हे जाणून घेण्याचा प्रयत्न करण्यात आला. चला, जाणून घेऊया सर्वेक्षणातील आकडेवारी.
‘वोट वाइब’ने नागरिकांना विचारले की, त्यांनी आगामी विधानसभा निवडणुकीत कोणाला मतदान करायचे हे ठरवले आहे का? या प्रश्नाच्या उत्तरात 64.4 टक्के लोकांनी आपण पूर्णपणे निर्णय घेतल्याचे सांगितले. 19 टक्के लोकांनी अद्याप अंतिम निर्णय घेतलेला नसल्याचे सांगितले. 8.7 टक्के लोकांनी अद्याप काहीही ठरवले नसल्याचे म्हटले. तर 8 टक्के लोकांनी याबाबत सध्या काहीही सांगता येणार नसल्याचे सांगितले.
सर्वेक्षणात नागरिकांना उत्तर प्रदेशचा पुढील मुख्यमंत्री म्हणून कोणाला पाहायला आवडेल? असा प्रश्नही विचारण्यात आला. या प्रश्नाच्या उत्तरात 43.4 टक्के लोकांनी योगी आदित्यनाथ (भाजप) यांना पसंती दिली. तर 35.5 टक्के लोकांनी अखिलेश यादव (सपा) यांना पुढील मुख्यमंत्री व्हावे, असे मत व्यक्त केले.
याशिवाय 5.9 टक्के लोकांनी मायावती (बसपा) यांना पसंती दिली. 3 टक्के लोकांनी प्रियंका गांधी (काँग्रेस) यांचे समर्थन केले. 6 टक्के लोकांनी इतर पर्यायांना पसंती दर्शवली. तर 6.3 टक्के लोकांनी याबाबत काहीही सांगता येणार नसल्याचे म्हटले.
