Viral News: लंडन: आपल्या पाळीव प्राण्यावर जीवापाड प्रेम करणाऱ्यांसाठी एक अत्यंत हादरवणारी घटना समोर आली आहे. ब्रिटनमध्ये एका 52 वर्षीय महिलेला आपल्या लाडक्या कुत्र्याने प्रेमाने चाटणे इतके महागात पडले की, तिला आपले दोन्ही हात आणि दोन्ही पाय गमवावे लागले आहेत. इतकेच नाही तर मृत्यूशी झुंज देत असताना तिला तब्बल 6 वेळा हृदयविकाराचा झटका आला.
नेमकं काय घडलं?
ब्रिटनमध्ये राहणाऱ्या मंजीत संघा या जुलै 2025 मध्ये नेहमीप्रमाणे कामावरून घरी परतल्या. घरी आल्यावर त्यांना थोडी अस्वस्थता जाणवू लागली. सुरुवातीला कामाचा ताण आणि थकवा असावा, असे समजून त्यांनी त्याकडे दुर्लक्ष केले. मात्र, रात्री त्यांची प्रकृती वेगाने खालावली.
त्यानंतर त्यांना तातडीने रुग्णालयात दाखल करण्यात आले. तपासणीदरम्यान डॉक्टरांनी त्यांना सेप्सिस नावाचा गंभीर संसर्ग झाल्याचे सांगितले. उपचार सुरू असताना त्यांना 6 वेळा हृदयविकाराचे झटके आले. संसर्ग संपूर्ण शरीरात पसरल्यामुळे डॉक्टरांना त्यांचा जीव वाचवण्यासाठी कठोर निर्णय घ्यावा लागला. अखेरीस त्यांचे दोन्ही हात आणि गुडघ्याखालचे दोन्ही पाय कापावे लागले.
कुत्र्याच्या चाटण्यामुळे पसरले इन्फेक्शन
डॉक्टरांनी दिलेल्या माहितीनुसार, त्यांच्या शरीरावर एक छोटी जखम होती. त्यांच्या पाळीव कुत्र्याने त्या जखमेवर चाटले होते. कुत्र्यांच्या लाळेमध्ये कॅपनोसायटोफेगा कॅनिमोरसस नावाचा बॅक्टेरिया असू शकतो. हा बॅक्टेरिया जखमेद्वारे शरीरात गेल्यास सेप्सिससारखा गंभीर संसर्ग होऊ शकतो. या संसर्गामुळे शरीरातील अवयव निकामी होण्याचा धोका असतो.
या घटनेमुळे डॉक्टरांनी पाळीव प्राणी असलेल्या नागरिकांना सतर्क राहण्याचा सल्ला दिला आहे. शरीरावर जखम असल्यास ती स्वच्छ ठेवावी आणि प्राण्यांना त्या भागाला चाटू देऊ नये. तसेच अचानक ताप, अशक्तपणा किंवा श्वास घेण्यास त्रास झाल्यास त्वरित वैद्यकीय मदत घ्यावी. योग्य काळजी घेतल्यास असे धोके टाळता येऊ शकतात.
