उत्तर प्रदेश: प्रयागराज जिल्ह्यातील बारा पोलिस ठाण्याअंतर्गत छिडी ग्रामपंचायतीतील एका प्राचीन मंदिरात खजिना लपलेला असल्याच्या अफवेमुळे एक अनोखी घटना उघडकीस आली आहे. येथे अज्ञात व्यक्तींनी ‘पत्थर बंदी’ मंदिराच्या भिंती फोडून खजिना शोधण्यासाठी खोदकाम केल्याचा प्रकार समोर आला आहे.
ही घटना रविवारी (9 नोव्हेंबर) रोजी सकाळी उघडकीस आली. सदर घटनेची माहिती ग्रामपंचायत प्रमुख यांनी पोलिसांना दिल्यानंतर पोलिसांनी घटनास्थळी भेट देऊन तपास सुरू केला. ग्रामप्रमुखांच्या तक्रारीवरून अज्ञात व्यक्तींविरुद्ध गुन्हा दाखल करण्यात आला आहे.
पोलिसांनी तपास करून सांगितले की, हे कृत्य धार्मिक भावना दुखावण्यासाठी करण्यात आलेले नसून मंदिरात लपलेल्या कथित खजिन्याचा शोध घेण्यासाठी केलेले दिसून येत आहे.
खजिना लपलेला आहे अशी लोकप्रिय कथा
समोर आलेल्या माहितीनुसार, येथील ‘पत्थर बंदी मंदिर’ हे अत्यंत प्राचीन असून त्यात खजिना लपलेला आहे अशी लोकप्रिय कथा पिढ्यान्पिढ्या सांगितली जाते. याच कथेमुळे काही व्यक्तींनी भिंत फोडून उत्खनन केल्याचा संशय व्यक्त केला जात आहे.
या घटनेनंतर ग्रामस्थांमध्ये संतापाचं वातावरण आहे. पोलिसांचा तपास सुरू असून पर्यटन विभागाचे एक पथक मंदिराचे सौंदर्यीकरण व नूतनीकरण करण्यासाठी घटनास्थळी दाखल झाले आहे.
या प्रकरणात अजून कोणालाही अटक झालेली नसून, मंदिरातील खजिन्याबाबतच्या अफवेमुळेच ही घटना घडल्याचं प्रशासनाने स्पष्ट केलं आहे.
