पिंपरी-चिंचवड: पिंपरी-चिंचवड आणि पुणे शहराला जोडणाऱ्या माण-हिंजवडी ते शिवाजीनगर मेट्रो मार्गिका 3 प्रकल्पाबाबत महत्त्वाची माहिती समोर आली आहे. माण ते बालेवाडी या सुमारे 13 किलोमीटरच्या पहिल्या टप्प्याचे काम पूर्ण झाले आहे. आता या मार्गावर प्रत्यक्ष प्रवासी सेवा कधी सुरू होणार, याकडे नागरिकांचे लक्ष लागले आहे.
पुणे महानगर प्रदेश विकास प्राधिकरणाने म्हणजेच पीएमआरडीएने हा 23.20 किलोमीटर लांबीचा प्रकल्प हाती घेतला आहे. त्यातील माण येथील मेट्रो स्टेशन क्रमांक 1 पासून आर. के. लक्ष्मण म्युझियम, बालेवाडी येथील स्टेशन क्रमांक 12 पर्यंतचा भाग पूर्ण करण्यात आला आहे.
या मार्गावर प्रवासी वाहतूक सुरू करण्यासाठी रेल्वे सुरक्षा आयुक्तांकडून 23 जुलै रोजी मंजुरी मिळाली होती. त्यामुळे मंजुरीनंतर काही दिवसांत मेट्रो सेवा सुरू होईल, अशी अपेक्षा व्यक्त केली जात होती. मात्र, उद्घाटनाची अधिकृत तारीख अद्याप जाहीर झालेली नाही.
दरम्यान, पीएमआरडीए आणि सवलतधारक कंपनी पुणे आयटी सिटी मेट्रो रेल कंपनीकडून आवश्यक प्रशासकीय प्रक्रिया पूर्ण करण्यात आली आहे. मुख्यमंत्री देवेंद्र फडणवीस यांनी या मेट्रो प्रकल्पाच्या उद्घाटनासाठी पंतप्रधान नरेंद्र मोदी यांच्या सोयीने वेळ निश्चित करण्याची विनंती करणारे पत्र पंतप्रधान कार्यालयाला पाठवले होते.
यानंतर पीएमओने राज्याच्या मुख्य सचिवांकडून प्रकल्पाबाबत प्रशासकीय माहिती मागवली. सामान्य प्रशासन विभागाने पुणे जिल्हाधिकाऱ्यांना तातडीने अहवाल सादर करण्याच्या सूचना दिल्या होत्या. त्यानुसार जिल्हाधिकारी कार्यालयाने मेट्रो प्रकल्पासंदर्भातील सविस्तर अहवाल पंतप्रधान कार्यालयाकडे पाठवला आहे.
शिवाजीनगरच्या दिशेने पुढील काही स्थानके लवकर सुरू करता यावीत, यासाठी प्रकल्पाचे काम वेगाने सुरू असल्याची माहिती पीएमआरडीएचे आयुक्त डॉ. अभिजित चौधरी यांनी दिली. त्यामुळे आता उद्घाटनाची तारीख कधी जाहीर होते, याची उत्सुकता नागरिकांना लागली आहे.
