तेहरान: मध्यपूर्वेतील धुमसणारा संघर्ष आता एका अत्यंत धोकादायक वळणावर येऊन पोहोचला आहे. बुधवारी रात्री उशिरा इराणच्या ‘बुशेहर’ या एकमेव कार्यरत अणुऊर्जा प्रकल्पावर क्षेपणास्त्र हल्ला करण्यात आला. सुदैवाने, या हल्ल्यात अणुभट्टीच्या मुख्य गाभ्याला इजा झालेली नाही आणि जीवितहानी टळली आहे. मात्र, या एका घटनेने संपूर्ण जगात भीतीचे वातावरण आहे.
बुशेहर प्रकल्प हा इराणच्या ऊर्जा सुरक्षेचा कणा आहे. 2011 पासून हा प्रकल्प रशियाच्या तांत्रिक मदतीने चालवला जातो. जर हे क्षेपणास्त्र चुकूनही अणुभट्टीच्या ‘कोअर’वर आदळले असते, तर त्यातून होणारा किरणोत्सर्ग केवळ इराणपुरता मर्यादित राहिला नसता. याचे भीषण परिणाम आखाती देश, दक्षिण आशिया आणि अगदी युरोपपर्यंत जाणवले असते. संयुक्त राष्ट्रांच्या IAEA या संस्थेने तातडीचा ‘अलर्ट’ जारी करत सर्व देशांना संयम राखण्याचे आवाहन केले आहे.
रशियाचा थेट इशारा: परिस्थिती हाताबाहेर?
या घटनेनंतर रशियाने अत्यंत आक्रमक पवित्रा घेतला आहे. बुशेहर प्रकल्पात आजही अनेक रशियन अभियंते कार्यरत आहेत. रशियाच्या परराष्ट्र मंत्रालयाने अमेरिका आणि इस्रायलला कडक शब्दांत सुनावले आहे की, “आमच्या नागरिकांच्या जीवाशी खेळ झाला, तर त्याचे परिणाम विद्ध्वंसक असतील.” या विधानामुळे आता हा संघर्ष केवळ दोन देशांपुरता न राहता महासत्तांमधील युद्धात रूपांतरित होण्याची चिन्हे आहेत.
