पुणे: ज्याची प्रेक्षक गेल्या अनेक (Dhurandhar 2) महिन्यांपासून चातकासारखी वाट पाहत होते, तो ‘धुरंधर २: द रिव्हेंज’ आज 19 मार्च 2026 रोजी जगभरात प्रदर्शित झाला आहे. 18 मार्च रोजी पार पडलेल्या स्पेशल प्री-रिलीज शोनंतर सोशल मीडियावर या चित्रपटाने अक्षरशः वादळ निर्माण केले असून, पहिल्याच दिवशी बॉक्स ऑफिसचे सर्व विक्रम मोडीत निघण्याची चिन्हे आहेत.
कोण आहेत ‘बडे साहब’?
पहिल्या भागात ज्या ‘बडे साहब’ च्या नावाने प्रेक्षकांमध्ये दहशत निर्माण केली होती, त्यामागचा चेहरा अखेर समोर आला आहे. चित्रपटात ‘बडे साहब’ म्हणजे दुसरे तिसरे कोणी नसून कुप्रसिद्ध अंडरवर्ल्ड डॉन दाऊद इब्राहिम असल्याचे दाखवण्यात आले आहे. एका वृद्ध आणि थकलेल्या, तरीही तितक्याच क्रूर रूपात ही व्यक्तिरेखा साकारण्यात आली आहे. सूत्रांच्या माहितीनुसार, अभिनेते दानिश इक्बाल यांनी ही अत्यंत आव्हानात्मक भूमिका चांगल्या पद्धतीने साकारली आहे, त्यांच्या लूकची सध्या सर्वत्र चर्चा आहे.
‘उरी’ फेम दिग्दर्शक आदित्य धर यांनी पुन्हा एकदा सिद्ध केले आहे की, सस्पेन्स आणि ॲक्शनचा अचूक मेळ कसा घालावा. चित्रपटात रणवीर सिंगचा रांगडा अंदाज आणि त्याला तोडीस तोड संजय दत्त व आर. माधवन यांच्या भूमिका कथेला अनपेक्षित वळणे देतात. अर्जुन रामपाल आणि सारा अर्जुन यांनीही आपल्या अभिनयाने छाप पाडली आहे. तांत्रिकदृष्ट्या हा चित्रपट हॉलिवूडच्या तोडीचा असल्याचे प्रेक्षकांचे म्हणणे आहे.
चित्रपट का बघावा?
-
वास्तववादी चित्रण: अंडरवर्ल्डचे जाळे आणि आंतरराष्ट्रीय राजकारण यांचे चित्रण अत्यंत वास्तववादी पद्धतीने करण्यात आले आहे.
-
सस्पेन्सचा थरार: चित्रपट शेवटपर्यंत प्रेक्षकांना खुर्चीला खिळवून ठेवतो. ‘बडे साहब’ची ओळख हा केवळ एक भाग असून, कथेतील इतर धक्के थक्क करणारे आहेत.
-
संगीत आणि पार्श्वसंगीत: चित्रपटाचे बॅकग्राउंड म्युझिक अंगावर शहारे आणणारे आहे.
थोडक्यात सांगायचे तर, ‘धुरंधर 2’ हा केवळ एक चित्रपट नसून तो भारतीय सिनेसृष्टीतील एक मोठा ‘माईलस्टोन’ ठरणार आहे. जर तुम्ही अॅक्शन आणि थ्रिलर प्रेमी असाल, तर हा चित्रपट चुकवून चालणार नाही.
