Rahul Gandhi Criticizes Pm Modi : नवी दिल्ली : छत्तीसगढच्या सभेत राहुल गांधी यांचा पंतप्रधान नरेंद्र मोदींवर गंभीर आरोप. यावेळी त्यांनी गौतम अदाणी यांचा उल्लेख करत जोरदार भाषण केलं. त्याशिवाय नोटबंदी, काळा पैसा, जीएसटी असे प्रश्न विचारत पंतप्रधान नरेंद्र मोदींवर टीका केली आहे.
नरेंद्र मोदी, गौतम आदानींवर टीका
भाषणावेळी त्यांनी काँग्रेसचा कार्यकाळ आणि आत्ताचे भाजप सरकार यांच्यातील महागाची तफावत मांडली. काँग्रेसच्या काळात सिलिंडर ४०० रुपयांचा मिळत होता आज किंमत किती झाली? १२०० रुपये. नरेंद्र मोदी म्हणाले होते १५ लाख रुपये प्रत्येकाच्या अकाऊंटमध्ये जमा होतील. शेतकऱ्यांसाठी जे कायदे आणले त्यामुळे शेतकरी आंदोलनाला बसले होते. पंतप्रधान नरेंद्र मोदी कायदे हे सर्वसामान्यांसाठी, शेतकऱ्यांसाठी, तरूणांसाठी आणत नाहीत तर, गौतम अदाणींसाठी आणत आहेत.
लोकांच्या जमिनी, पाणी सगळं अदाणींकडे वळवलं जातं
गौतम अदाणींना खाणी दिल्या जातात, जंगलं दिली जातात. पाणी, जमीन सगळं तुमच्याकडून हिरावून अदाणींना दिलं जातं आहे. भाजपाचे लोक आले की ते फक्त एकच गोष्ट करतात खोटी आश्वासनं देणं. आम्ही खोटी आश्वासनं देणार नाही. आमचं सरकार आल्यानंतर आम्ही सिलिंडरवर ५०० रुपयांची सबसिडी देऊ. बेरोजगार, मजूर, गरीब लोकांच्या खिशात पैसे कसे जातील आम्ही पाहू. मोदींना तसं वाटत नाही, त्यांना वाटतं सगळा पैसा अदाणींच्या खिशात जावा. शेतकरी, गरीब, छोटे दुकानदार, मजूर यांच्या खिशात पैसे गेले पाहिजेत यासाठी काँग्रेस प्रयत्न करतं आहे यापुढेही करणार आहे असंही राहुल गांधी म्हणाले. छत्तीसगढ हे राज्य गरीब नाही. मात्र भाजपाचं सरकार आलं की इथला पैसा उद्योगपतींना दिला जातो आहे. त्यामुळे यावेळी सरकार गरीबांचं सरकार आलं पाहिजे. जे काम फक्त काँग्रेस करतं. आम्हाला गरीबांना मदत करणं ठाऊक आहे आणि भाजपाला उद्योजकांना मदत करणं ठाऊक आहे असंही राहुल गांधी यांनी म्हटलं आहे.
