पुणे: आधीच पेट्रोल आणि घरगुती गॅसच्या वाढत्या किमतींमुळे हैराण असलेल्या पुणेकरांना आता सीएनजी (CNG) महागाईचा मोठा झटका बसला आहे. पुणे शहर आणि परिसरात सीएनजीच्या दरात प्रति किलो 2 रुपयांची वाढ करण्यात आली असून, नवे दर मध्यरात्रीपासून लागू झाले आहेत. या निर्णयामुळे रिक्षा व्यावसायिक, सार्वजनिक वाहतूक आणि सीएनजीवर चालणाऱ्या खासगी वाहनधारकांमध्ये चिंतेचे वातावरण आहे.
पुण्यात आता सीएनजीसाठी ग्राहकांना प्रति किलो 94.50 रुपये मोजावे लागणार आहेत. यापूर्वी हा दर 92.50 रुपये होता. केवळ सीएनजीच नाही, तर ‘इंडियन ऑइल’ने (IOCL) त्यांच्या प्रीमियम श्रेणीतील इंधनांचे दरही वाढवले आहेत. अतिशय शुद्ध मानले जाणारे ‘XP100’ पेट्रोल आता थेट 160 रुपये प्रति लिटरवर पोहोचले असून, ‘एक्स्ट्रा ग्रीन’ डिझेलच्या किमतीतही दीड रुपयांची वाढ झाली आहे.
आंतरराष्ट्रीय स्तरावर सुरू असलेल्या इराण-इस्रायल युद्धाचा परिणाम आता थेट पुणेकरांच्या खिशावर होताना दिसत आहे. युद्धामुळे जागतिक बाजारपेठेत कच्च्या तेलाचा पुरवठा विस्कळीत झाला असून इंधनाची टंचाई निर्माण झाली आहे. पुरवठा साखळीवर झालेल्या या परिणामामुळे स्थानिक पातळीवर कंपन्यांना दरवाढ करणे भाग पडले आहे.
