सुरत : कुख्यात गँगस्टर सतीश मराठा हत्या प्रकरणात पोलिसांच्या तपासाला मोठे वळण मिळाले आहे. या प्रकरणातील मुख्य सूत्रधार म्हणून गँगस्टर राहुल मंडल याचे नाव समोर आले असून, पोलिसांनी त्याला थेट सुरत मध्यवर्ती कारागृहातून ताब्यात घेतले आहे. विशेष म्हणजे हत्येचा कट रचला त्यावेळी राहुल मंडल आधीपासूनच जेलमध्ये बंद होता, अशी माहिती तपासातून समोर आली आहे.
पोलिसांच्या चौकशीत सतीश मराठाच्या हत्येसाठी राहुल मंडलने दोन आरोपींची मदत घेतल्याचे उघड झाले आहे. केतन सिरसाथ आणि राहुल दुबे यांच्यासह इतर आरोपींच्या माध्यमातून हा कट प्रत्यक्षात आणण्यात आल्याचे पोलिसांचे म्हणणे आहे. या दोन्ही आरोपींना पोलिसांनी यापूर्वीच अटक केली आहे.
ही हत्या 5 ऑगस्ट रोजी करण्यात आली होती. त्यावेळी सुमारे 10 जणांच्या टोळीने सतीश मराठाच्या कारचा रस्ता अडवला. त्यानंतर हल्लेखोरांनी धारदार शस्त्रांनी त्याच्यावर हल्ला केला. या घटनेदरम्यान गोळीबारही करण्यात आल्याची माहिती पोलिसांनी दिली आहे.
या प्रकरणी सतीशचा मोठा भाऊ हितेश धागडे यांच्या तक्रारीवरून भेस्तान पोलिसांनी तपास सुरू केला. 6 ऑगस्ट रोजी पोलिसांनी 6 आरोपींना अटक केली, तर 3 अल्पवयीन मुलांना ताब्यात घेतले होते. आरोपींची चौकशी केल्यानंतर या हत्येमागील सूत्रधार राहुल मंडल असल्याचा संशय अधिक बळकट झाला.
पोलिसांच्या माहितीनुसार, जेलमध्ये असतानाही मंडलने आपल्या साथीदारांशी संपर्क साधला होता. त्यानंतर सतीश मराठाच्या हत्येसाठी कट रचण्यात आला होता.
केतन सिरसाथ आणि राहुल दुबे यांच्या चौकशीतील माहितीच्या आधारे भेस्तान पोलिसांनी सुरत मध्यवर्ती कारागृहात जाऊन राहुल मंडलला ताब्यात घेतले. त्याला न्यायालयात हजर करण्यात आले असून न्यायालयाने 15 ऑगस्टपर्यंत पोलीस कोठडी सुनावली आहे. या प्रकरणाचा पुढील तपास भेस्तान पोलीस करत आहेत.
