इराण: इराण आणि अमेरिका यांच्यातील वाढता तणाव पुन्हा एकदा जागतिक चिंतेचा विषय ठरला आहे. शांतता चर्चेच्या माध्यमातून मार्ग निघेल अशी अपेक्षा असतानाच, दोन्ही देशांतील संघर्ष अचानक तीव्र झाला आहे. शुक्रवारी अमेरिकेने इराणच्या लष्करी तळांवर आक्रमक एअर स्ट्राइक केल्यानंतर, इराणनेही अमेरिकन तळांना लक्ष्य केल्याचा दावा केला आहे. या परिस्थितीमुळे पुन्हा एकदा मध्य पूर्वेत युद्धाचे ढग गडद झाले आहेत.
या वादाची सुरुवात गुरुवारी झाली. होर्मुजच्या समुद्रधुनीजवळ इराणने एका व्यापारी जहाजावर ४ आत्मघाती ड्रोन सोडून हल्ला करण्याचा प्रयत्न केला. यातील १ ड्रोन जहाजाला धडकला, तर उर्वरित ३ ड्रोन अमेरिकन संरक्षण यंत्रणेने आकाशातच पाडले. अमेरिकन सेंट्रल कमांडने या कृत्याला युद्धविरामाचे उल्लंघन मानले असून, प्रत्युत्तर म्हणून अमेरिकन फायटर जेट्सनी इराणच्या सीमेवरील ड्रोन आणि मिसाईल तळांवर, तसेच रडार यंत्रणांवर अचूक हल्ले केले आहेत.
अमेरिकेचे राष्ट्राध्यक्ष डोनाल्ड ट्रम्प यांनी इराणच्या या कृत्यावर तीव्र शब्दांत नाराजी व्यक्त केली आहे. हा हल्ला म्हणजे एक मोठी चूक असल्याचे अमेरिकेचे म्हणणे आहे. दुसरीकडे, इराणचे प्रवक्ते इब्राहिम अल-फिकार यांनी अमेरिकेला इशारा दिला आहे. इराणने खाडी देशांमधील अमेरिकन तळांवर पलटवार केल्याचा दावा करत, भविष्यात अमेरिकेने अशीच आक्रमकता दाखवल्यास गंभीर परिणामांना सामोरे जावे लागेल, असे त्यांनी स्पष्ट केले.
काही दिवसांपूर्वीच दोन्ही देशांमध्ये सकारात्मक चर्चा झाली होती, मात्र या ताज्या संघर्षामुळे ती सर्व चर्चा आता व्यर्थ ठरली आहे. दोन्ही देशांमधील या तणावाचा थेट फटका जागतिक बाजाराला बसणार आहे. कच्च्या तेलाच्या किमतीत मोठी वाढ होण्याची शक्यता असून, याचा परिणाम जगभरातील महागाईवर होऊ शकतो.
