Pakistan Afghanistan War : पाकिस्तान आणि अफगाणिस्तानमधील सीमा तणाव आणि दहशतवादी हल्ल्यांवर तोडगा काढण्यासाठी दोन्ही देशांमध्ये तुर्कीमधील इस्तंबूल येथे चर्चेची नवी फेरी होणार असतानाच, पाकिस्तानचे संरक्षणमंत्री ख्वाजा आसिफ यांनी अफगाणिस्तानला थेट युद्धाची धमकी दिली आहे. आसिफ यांच्या या आक्रमक विधानामुळे शांतता चर्चेपूर्वीच दोन्ही देशांतील वातावरण पुन्हा एकदा चिघळले आहे. (Pakistan minister khawaja asif said there will be war against afghanistan)
दहशतवादावरून आरोप-प्रत्यारोप
एका पत्रकार परिषदेत बोलताना, पत्रकारांनी ‘तालिबानला थांबवण्यासाठी सैन्य कारवाई हाच एकमेव पर्याय आहे का?’ असा प्रश्न विचारला असता, ख्वाजा आसिफ यांनी केवळ दोन शब्दांत उत्तर दिले, “युद्धच होणार?”
आसिफ यांनी अफगाणिस्तानवर गंभीर आरोप करताना म्हटले की, अफगाणिस्तान ‘तहरीक-ए-तालिबान पाकिस्तान’ सारख्या दहशतवादी संघटनांना आश्रय देत आहे. याच दहशतवाद्यांकडून पाकिस्तानमध्ये हल्ले केले जात आहेत, ज्यामुळे देशातील दहशतवादी कारवाया वाढल्या आहेत. 2011 मध्ये अफगाणिस्तानमध्ये तालिबानची सत्ता आल्यापासून हे दहशतवादी संघटन अफगाणिस्तानच्या भूमीचा वापर करत असल्याचा पाकिस्तानचा दावा आहे.
दुसरीकडे, अफगाणिस्तान सातत्याने हे आरोप फेटाळत आला आहे. ‘आमच्या जमिनीचा वापर पाकिस्तानवर कारवाई करण्यासाठी केला जात नाही,’ असे अफगाणिस्तानचे म्हणणे आहे.
यापूर्वी दोन्ही देशांमध्ये चकमकी झाल्या होत्या. त्यानंतर युद्धविरामाची घोषणा झाली होती. व्यापार आणि सीमेवरील समस्या सोडवण्यासाठी इस्तंबूल येथे उच्चस्तरीय चर्चेची दुसरी फेरी नियोजित आहे. मात्र, या महत्त्वाच्या बैठकीच्या तोंडावरच संरक्षणमंत्री आसिफ यांनी दिलेली धमकी चर्चेच्या निष्कर्षांवर मोठे सावट निर्माण करत आहे. आता इस्तंबूल बैठकीत ख्वाजा आसिफ यांच्या विधानाचे पडसाद उमटणार का, याकडे संपूर्ण जगाचे लक्ष लागले आहे.
