Explosions in Iran: केरमन: इराणच्या केरमन शहरात दोन जोरदार स्फोट असून 103 लोकांचा मृत्यू झाला आहे. तर 170 हून अधिक लोक जखमी झाले आहेत. न्यूज एजन्सी एएफपीने ही माहिती दिली. देशाचे माजी जनरल कासिम सुलेमानी यांच्या कबरीजवळ हे स्फोट झाले. सुलेमानी यांच्या हत्येच्या चौथ्या स्मृतीदिनानिमित्त आयोजित कार्यक्रमादरम्यान हे स्फोट झाल्याची माहिती इराणच्या सरकारी माध्यमांनी दिली आहे.
इराणच्या नायब राज्यपालांनी या घटनेला दहशतवादी हल्ला असल्याचे म्हटले आहे. अमेरिकेने 2020 मध्ये जनरल कासिम सुलेमानी यांना ड्रोन हल्ल्यात ठार केले. इराणचे सर्वोच्च नेते अयातुल्ला अली खामेनी यांच्यानंतर सुलेमानी यांची गणना देशातील सर्वात शक्तिशाली व्यक्तींमध्ये होत होती. सोशल मीडियावर व्हायरल होत असलेल्या व्हिडिओमध्ये अनेक मृतदेह रस्त्यावर पडलेले दिसत आहेत. इराणच्या राज्य माध्यमांवर पोस्ट केलेल्या व्हिडिओमध्ये स्फोटानंतर मोठ्या प्रमाणात लोकसमुदाय परिसरातून पळ काढताना दिसत आहे. अशा परिस्थितीत मृतांचा आकडा आणखी वाढू शकतो.
मृतांचा आकडा वाढू शकतो
इराणच्या नॅशनल इमर्जन्सी सर्व्हिसेस ऑर्गनायझेशनचे प्रवक्ते बाबक येकता परस्त यांनी सांगितले की, या स्फोटात मृतांचा आकडा आणखी वाढण्याची शक्यता आहे. अल जझीराच्या वृत्तानुसार, प्रवक्त्याने दूरध्वनीवरून सरकारी टेलिव्हिजनला सांगितले की, आम्हाला मिळालेल्या माहितीवरून असे दिसते की, जखमींपैकी अनेकांची प्रकृती गंभीर आहे. गरज भासल्यास केरमनहून राजधानी तेहरानमधील रूग्णांनारुग्णालयात नेण्यासाठी आपत्कालीन सेवा हेलिकॉप्टर तयार असल्याचेही त्यांनी सांगितले.
माजी जनरलचा मृत्यू कसा झाला?
3 जानेवारी 2020 रोजी बगदाद विमानतळावर अमेरिकेच्या ड्रोन हल्ल्यात माजी जनरल सुलेमानी मारले गेले. अशा स्थितीत आज त्यांच्या मृत्यूला चार वर्षे पूर्ण झाली आहेत. त्यानिमित्त त्यांच्या स्मरणार्थ कार्यक्रमाचे आयोजन करण्यात आले होते. दरम्यान हे स्फोट झाले. 2020 मध्ये ट्रम्प यांनी सुलेमानीच्या मृत्यूला सर्वात मोठा विजय म्हणून वर्णन केले होते आणि त्यांना जगातील नंबर वन दहशतवादी देखील म्हटले होते.
