मुंबई : भारत सांस्कृतिक वारशासाठी जगभरात प्रसिद्ध आहे. त्यातच भारतीय खाद्यपदार्थ म्हणजे अनेकांचा आवडीचा विषय आहे. परदेशी नागरिक खास त्यांच्या आवडीचे खाद्यपदार्थ चाखण्यासाठी भारताला भेट देतात. यातील सर्वात जास्त पसंत केली जाणारी भारतीय डिश म्हणजे आपल्या सर्वांची आवडती बिर्याणी. भारतीयांमध्येही बिर्याणी सर्वात प्रसिद्ध आहे.
यामुळेच यंदाही सर्वाधिक लोकांनी बिर्याणीची ऑर्डर दिली आहे. झोमॅटोच्या सर्वेनुसार, 2023 मध्ये बिर्याणी आणि पिझ्झा फूड ऑर्डरिंगच्या ट्रेंडमध्ये अव्वल स्थानावर आहेत. यंदा नागरिकांनी झोमॅटोकडून तब्बल 10.09 कोटी बिर्याणी ऑर्डर केल्या आहेत आणि दुसरीकडे 7.45 कोटी पिझ्झा ऑर्डर केले आहेत.
झोमॅटोची सर्वात मोठी 46,273 रुपयांची ऑर्डर बेंगळुरू येथील एका व्यक्तीने दिली आहे. मुंबईतील एका व्यक्तीने एका दिवसात 121 ऑर्डर देण्याचा विक्रम केला आहे. बेंगळुरूमधीलच अजून एका व्यक्तीने झोमॅटोद्वारे 6.6 लाख रुपयांच्या 1389 भेटवस्तू ऑर्डर केल्या होत्या. झोमॅटोने मुंबईतील हानिस नावाच्या व्यक्तीला देशात सर्वात जास्त खाद्यपदार्थ दिले आहे. या व्यक्तीने 2023 मध्ये एकूण 3580 दररोज 9 ऑर्डर दिल्या आहेत.
यंदा म्हणजेच 2023 मध्ये बेंगळुरूमध्ये झोमॅटोवर सर्वाधिक नाश्त्याच्या ऑर्डर देण्यात आल्या, चालू आर्थिक वर्षाच्या पहिल्या तिमाहीत झोमॅटोला केवळ 2 कोटी रुपयांचा नफा झाला होता. याबाबत कौतुकासोबतच सोशल मीडियावर जोक्सही केले जात होते. पण तो विनोद झोमॅटोचे सीईओ दीपंदर गोयल यांनी सकारात्मक घेतले. कारण त्यांना माहित होते की, ही फक्त सुरुवात आहे, कंपनी प्रथमच तोट्यातून नफ्यात वळली होती. नफा केवळ दोन कोटी रुपये असला तरी कंपनीचा उत्साह वाढवण्यासाठी पुरेसा होता.
